एजेन्सी । इंग्लिस क्लब लिभरपुलका प्रशिक्षक योर्गेन क्लोपले विश्व फुटबलमा क्रिस्टियानो रोनाल्डो भन्दा लियोनल मेस्सी उत्कृष्ट भएको बताएका छन् ।
एक युट्युब च्यानल फ्रिकिकर्जसँग कुरा गर्दै जर्मन प्रशिक्षक क्लोपले रोनाल्डोको तुलनामा मेस्सी 'पर्फेक्ट प्लेयर' भएको बताएका हुन् ।
'मेरो लागि मेस्सी हो । उनको भन्दा धेरै रोनाल्डोको प्रशंसा गर्न सक्दिन,' क्लोपले भनेका छन्,'हामीले दुवैविरुद्ध खेलेका छौँ । दुबैलाई रोक्न असम्भव छ ।'
विश्व फुटबलमामा पछिल्लो समय बार्सिलोनाका फरवार्ड मेस्सी र युभेन्ट्सका फरवार्ड रोनाल्डोबीच को महान खेलाडी भन्नेमा विवाद रहदै आएको छ ।
मेस्सी र रोनाल्डो आफ्नो पुस्ताको सर्वकालीन महान खेलाडीमा पर्छन । दुवैले क्लब फुटबलमा कीर्तिमानसहित ठुला उपाधि जितिसकेका छन् ।
क्लोपले मेस्सी जन्मजात नै शारीरिक रुपमा कमजोर देखिएपनि मैदानमा उत्कृष्ट खेल्ने गरेको बताए ।
'यदि तपाई एक उत्तम खेलाडी बनाउनु सक्नुहुन्छ भने रोनाल्डोको उचाई हो । ऊ उफ्रन सक्छ र छिटो दौड्न सक्छ। र, ऊ पेशेवर छ,' क्लोपले भने, 'अर्कोतर्फ मेस्सी सानो छ । जसको सबै साधारण देखिन्छ । त्यसैले म उसलाई मैदानमा मन पराउछु । तर, रोनाल्डो नि अविश्वसनीय खेलाडी हो ।'
मेस्सीले कीर्तिमानी ६ पटक बालोन डी'ओर अवार्ड जितेका छन् । यस्तै रोनाल्डोले पाँच पटक जितेका छन् ।
अर्जेन्टिनाका मेस्सीले बार्सिलोनाबाट मात्र व्यवसायिक फुटबल खेलेका छन् । तर, रोनाल्डोले रियल मड्रिड, म्यानचेष्टर युनाइटेड लगायतका ठुला क्लबबाट खेलिसकेका छन् ।
पोर्चुगिज फरवार्ड रोनाल्डोले राष्ट्रका लागि युरो कप र नेसन्स कप जितेका छन् । मेस्सीले भने राष्ट्रका लागि ठुला उपाधि जितेका छैनन् ।
