एजेन्सी । लण्डन क्लब चेल्सी म्यान्चेष्टर युनाईटेडका युवा स्टार एन्जल गोम्सलाई अनुबन्ध गर्न आफु सफल हुने अपेक्षा गरेको छ ।
१९ बर्षिया मिडफिल्डरका एजेण्ड पिनी जाहाभी निरन्तर लण्डन क्लबसंग सम्पर्कमा छन् । ईङ्ल्याण्डका यू–२० टिमका महत्वपूर्ण सदस्य गोम्स लण्डन आउनेमा चेल्सी विश्वस्त देखिएको हो ।
युनाईटेडले गोम्ससंग नयाँ सम्झौताका लागि प्रयास गरेको थियो । तर गोम्सले युनाईटेडको पहिलो टिममा खासै अवसर पाएका छैनन् । उनले यस सिजन समेत मात्र ६ खेल खेल्ने अवसर पाए ।
चेल्सी प्रशिक्षक फ्रान्क लाम्पार्डले स्टामफोर्ड ब्रिजमा युवा खेलाडीलाई धेरैनै अवसर दिने गरेका छन् । मेसन माउन्ट, फिकायो तोमोरी र रिस जेम्स जस्ता खेलाडी चेल्सीमा आफुलाई स्थापित गर्न सफल भएका छन् ।
गोम्स नेतृत्वको ईङ्ल्याण्डको यू–१९ टिम विश्वकपमा सफल भएको थियो । उनले गत महिनामात्र आफु युनाईटेडमा बस्न चाहेको र धेरै उपाधि जित्न चाहेको बताएका थिए ।
'मैले यसलाई धेरै बर्षदेखि देखेको छु । एकेडेमीबाट आएको हुँ । आफ्नो सम्पूर्ण करियर युनाईटेडमै बिताउन चाहन्छु ।' उनले एक अन्तरवार्तामा भनेका थिए ।
'म केही गर्न चाहन्छु, क्लबका लागि केही उपाधि जित्न चाहन्छु ।' उनले थपे ।
युनाईटेडले गोम्स आफ्नो करियर बनाउन ताहित चोङ्गको बाटो अपनाउने अपेक्षा गरेको थियो ।
प्रशिक्षक आले गुनर सोल्सायरले भनेका थिए, ताहितसंग हामी निकै खुसी छौ । उनी आफ्नो भविष्य देखिरहेका छन् । हामी एक राम्रो खेलाडी देखिरहेका छौ । हामी उनलाई विकसित हुन समय दिन्छौ ।
एन्जलसंग समेत यस्तै हुनेछ । हामीलाई अपेक्षा छ, उनलाई हामी क्लबको खेलाडीको रुपमा दिर्घकालिन भविष्यको रुपमा मनाउन सक्छौ । सोल्सायरको भनेका थिए ।
