राष्ट्रिय टोलीका पूर्व सदस्य रञ्‍जितलाई कोरोना !

काठमाडौं । नेपाली राष्ट्रिय फुटबल टोलीका पूर्व मिडफिल्डर रञ्जित श्रेष्ठलाई कोरोना भाईरसको संक्रमण भएको छ ।

वैदेशिक रोजगारीका लागि दुबईमा रहेका रञ्‍जितलाई कोरोनाको संक्रमण देखिएको हो ।

रञ्जितले सामाजिक संजाल फेसबुकमा एक भिडियो सार्वजनिक गर्दै आफुलाई कारोना पोजेटिभ देखिएको बताएका छन् ।

'सेल्फ आइसोलेसनमा छु । मलाई कोरोनाको पोजेटिभ छ । तर, खासै त्यस्तो केहि लागेको जस्तो छैन मलाई । तातो पानी खान्छु । ब्यालेन्स डाइटमा बसेको छु,' रञ्‍जितले भनेका छन्, 'सबै मान्छेहरु प्यानिक भएको होला कोरोना भाईरसले गर्दा । तर आत्तिनुपर्ने केहि छैन । मलाई भएको भएको चार पाँच दिन भयो । नर्मल छु । कफ केहि छैन । कहिले काहि ड्राइ कफ हुन्छ । रुममा बसेको छु । खाना खान्छु । जगिङ गर्दै बसेको छु ।'

अखिल नेपाल फुटबल संघ (एन्फा) एकेडेमीका तेस्रो ब्याचका रञ्‍जितले नेपालबाट साफ च्याम्पियनसिप खेलेका थिए ।

सन् २००९ मा बंगलादेशमा आयोजना भएको साफमा रञ्‍जित नेपाली टोलीमा रहेका थिए । यस्तै रञ्‍जितले यू-१६ टोलीबाट नेपालको कप्तानी गरेका थिए ।

रञ्‍जितले कोरोनाको संक्रमण देखिएपनि नआतीन सुझाब दिएका छन् ।

'फेसबुकमा मेरो जति पनि साथी भाई हुनुहुन्छ । नडराउनु होला, डराउनु पर्ने छैन । नर्मल लिदा हुन्छ । आफुले बार्नु पर्छ । फेरि मेरो सेकेण्ड रिजल्ट के आउँछ भन्छु । फेरि भिडियो पोष्ट गर्नुछ,' उनले थपेका छन् ।

रञ्‍जितले फ्रेन्ड्स क्लब र न्युरोड टिम एनआरटीबाट व्यावसायिक फुटबल खेलेका थिए ।

रञ्‍जितले नेपालमा आयोजना भएको रेड्बुल फुटसल लिगमा चौर फुटसलबाट खेलेका थिए ।