क्लोज बार्यन म्युनिखका सहायक प्रशिक्षक

एजेन्सी । मिरोस्लाभ क्लोज जर्मन क्लब बार्यन म्युनिखका सहायक प्रशिक्षक नियुक्त भएका छन् ।

जर्मन राष्ट्रिय फुटबल टिमका सर्वाधिक गोलकर्ता क्लोजलाई बार्यनले अर्को सिजनका लागि सहायक प्रशिक्षकमा नियुक्त गरेको हो ।

४१ बर्षका क्लोजले पछिल्ला दुई बर्ष क्लबको युथ टिममा प्रशिक्षकको भूमिका निर्वाह गरेका थिए । उनले सन् २०१६ मा सक्रिय खेलाडी जिवनबाट सन्यासको घोषणा गरेका थिए ।

उनले क्लबसंग सहायक प्रशिक्षकको रुपमा एक बर्षको सम्झौता गरेका हुन् ।

उनले करियरका चार सिजन बार्यन म्युनिखमा बिताएका थिए । उनले सन् २००७ देखि क्लबका लागि खेल्दै लिग उपाधि सहित कप समेत जितेका थिए ।

'यो मेरो प्रशिक्षक जिवनको अर्को पाईला हो ।' क्लोजले भनेका छन् ।

बार्यनको मुख्य प्रशिक्षकको रुपमा हेन्सी फ्लिकले पछिल्ला महिना सम्झौता गरेका थिए । उनीले सन् २०१४ मा जर्मनीलाई विश्वकप जिताउदा टिममा सहायक प्रशिक्षकको भूमिका निर्वाह गरेका थिए ।

'हामी राष्ट्रिय टिमबाटै एक अर्कालाई राम्रोसंग जान्दछौ । हामी व्यवसायीक रुपमा एक अर्काप्रति भरोसा गर्दछौ ।' क्लोजले भनेका छन् ।

क्लोजले जर्मनीबाट सन् २००१ देखि २०१४ सम्म १ सय ३७ खेल खेल्दै ७१ गोल गरेका छन् । उनले ईटालियन क्लब लाजियो सहित विभिन्न क्लबबाट ब्यवसायीक फुटबल खेलेका छन् ।