जोर्गिन्हो बेच्न चेल्सी तयार

एजेन्सी । लण्डन क्लब चेल्सी मिडफिल्डर जोर्गिन्होलाई बेच्ने विकल्प सहित छलफल गर्न तयार देखिएको छ ।

सिरि ए क्लब युभेन्ट्सले निरन्तर जोर्गिन्हो अनुबन्धमा निरन्तर चासो देखाएपछि चेल्सी समेत उनलाई बेच्ने विकल्पमा छलफल गर्न तयार देखिएको हो ।

युभेन्ट्सका प्रशिक्षक माउरिजियो सर्रीले तेस्रो पटक जोर्गिन्होमाथि चासो देखाउँदै लण्डन क्लब समक्ष प्रस्ताव पठाएका हुन् ।

जोर्गिन्हो र सर्रीले चेल्सीमा रहँदा एक सिजन संगै काम गरेका थिए । सर्री लण्डन क्लब चेल्सीको प्रशिक्षकको रुपमा आएपछि उनले जोर्गिन्होलाई सिरि ए क्लबबाट पहिलो हस्ताक्षरको रुपमा प्रिमियर लिग क्लबमा ल्याएका थिए ।

सर्रीले सन् २०१८ मा जोर्गिन्होलाई ५७ मिलियन पाउण्डमा नापोलीबाट लण्डन क्लबमा अनुबन्ध गरेका थिए ।

जोर्गिन्होले पहिलो सिजनमा अनावश्यक आलोचना ब्यहोरेका कारण लण्डन क्लब छाड्ने बिचार गरेको बताएका थिए ।

उनी पहिलो सिजन प्रिमियर लिग क्लबमा लयमा आउन संघर्षरत देखिएका थिए । उनलाई सर्रीले होल्डिङ मिडफिल्डरको जिम्मेवारी दिएका थिए ।

उनले एक अन्तरवार्तामा आफुमाथि अनावश्यक आलोचना गरिएको भन्दै गुनासो गरेका थिए ।

उनले भने, 'पछिल्लो बर्ष, प्रशंसकले ममाथि निकै प्रश्न गरे । किनकी म अर्को प्रशिक्षकसंग आएको थिए । मैले केही यस्ता कुरा सुने, जो साँचो रुपमा अनावश्यक थियो ।'

'तर मैले प्रशंसक र अन्य व्यक्तिका आलोचनालाई कुनै चुनौती दिईन । किनकी मलाई थाहा थियो, त्यो गलत थियो ।' जोर्गिन्होले थपे ।

लण्डन क्लब छाड्दै सर्रीले गत सिजन युभेन्ट्सको जिम्मेवारी लिएका थिए । लगत्तै उनी जोर्गिन्होलाई सिरि ए क्लबसंग जोड्न लागि परेका छन् ।