'एम्बाप्पे बार्सिलोना भन्दा रियलमा फिट'

एजेन्सी । स्पेनिस स्टार सेस फाब्रिगासले केलियन एम्बाप्पे रियल मड्रिडमा फिट हुने बताएका छन् ।

फ्रान्सेली क्लब पेरिस सेन्ट जर्मेन (पीएसजी)का स्टार फरवार्ड एम्बाप्पेको बिषयमा चर्चा गर्दै फाब्रिगासले उनी बार्सिलोना भन्दा रियल मड्रिडमा फिट हुने बताएका हुन् ।

२१ बर्षका विश्वकप विजेता पछिल्लो समय वर्नवेउ क्लबसंग जोडिएका छन् । कोरोना भाईरसले युरोपका क्लबहरुलाई आर्थिक संकटमा पार्नु अघि रियल मड्रिडले एम्बाप्पेलाई मड्रिड क्लब ल्याउने तयारी गरेको थियो ।

फ्रान्सका फरवार्ड एम्बाप्पेकोे पीएसजीसंगको सम्झौता सन् २०२२ सम्म रहेको छ । भर्खरै मात्र लिग वान च्याम्पियन क्लबले एम्बाप्पेलाई साप्ताहिक ६ लाख पाउण्डको प्रस्ताव गर्दै सम्झौता नविकरणको आग्रह गरेको छ । तर रिपोर्टका अनुसार एम्बाप्पेले रियल मड्रिड जान पाउने विकल्पमा मात्र नयाँ सम्झौतामा हस्ताक्षर गर्ने बताएका छन् ।

कोरोनाको संकट अघि रियलले एम्बाप्पेलाई अनुबन्धको प्रस्ताव राख्ने तयारी गरेको थियो । तर कोरोनाले गर्दा सिर्जित समस्याका कारण रियलले अर्को बर्षमात्र एम्बाप्पेलाई मड्रिड क्लब उतार्न सक्ने बताईएको छ ।

बार्सिलोना, आर्सनल र चेल्सीका पुर्व स्टार फाब्रिगासले नाउ क्याम्पका समर्थकलाई खिन्न बनाउँदै पुरानो प्रतिद्धन्दी क्लब रियलमा एम्बाप्पे फिट हुने दाबी गरेका हुन् ।

एक अन्तरवार्तामा उनले भनेका छन्, 'म उसलाई एक मिडफिल्डरको रुपमा हेर्ने गर्छु, उसलाई यस्तो एक फरवार्डको रुपमा मान्छु कि जोसंग म खेल्न चाहन्छु । उनी खाली ठाउँमा उत्कृष्ट तरिकाले अघि बढ्छन् । उनीसंग तिव्र समय छ । उनीसंग एक परिभाषा छ, उनी भोका देखिन्छन् ।'

'उनी यस्ता व्यक्ती हुन्, जो राम्रो बन्न चाहन्छन् । उनले खेल्दै गरेको हेर्न निकै शुखद लाग्छ । र उनी रियल मड्रिडमा वास्तविक रुपमा राम्रोसंग फिट हुन्छन् । बार्सिलोनामा पनि हुन्छन्, तर मलाई लाग्छ, विशेष रुपमा उनी रियलमा फिट हुन्छन् ।' फाब्रिगासले थपे ।

फाब्रिगास ला मासियाका खेलाडी हुन् । उनले आफु म्यानेजर भएको अवस्थामा लियोनल मेस्सी र क्रिस्टियानो रोनाल्डोलाई अनुबन्ध गर्न प्राथमिकतामा राख्ने समेत बताए ।

मोनाकोका मिडफिल्डर फाब्रिगासले पैसाले सरोकार नराख्ने भए आफुले एम्बाप्पेलाई अनुबन्ध गर्ने खुलाएका छन् । उनले फ्रान्सेली युवा स्टारलाई नयाँ थियरी हेनरीको रुपमा ब्याख्या गरेका छन् ।

एम्बाप्पे सन् २०१८ मा मोनाकोबाट पीएसजीमा स्थानान्तरण भएका थिए । उनले १ सय ३८ खेलमा ९० गोल समेत गरेका छन् ।

तर फ्रान्सेली क्लब पीएसजीले एम्बाप्पेले सम्झौता नविकरण गर्ने अपेक्षा गरेको छ । जसले उनलाई विश्व फुटबलका चौथो सर्वाधिक तलब बुझ्ने खेलाडी बनाउनेछ ।

एम्बाप्पेलाई रियलमात्र नभएर प्रियिमर लिगको शीर्ष क्लब लिभरपुलले समेत अनुबन्धमा चासो देखाएको छ । एनफिल्ड क्लबले एम्बाप्पेका बुवासंग भेटेर उनको सम्भावित नयाँ गन्तव्यको बिषयमा छलफल गरिसकेको छ ।