सम्झौता थप्न डिबालाको गृहकार्य

एजेन्सी । अर्जेन्टिनी फरवार्ड पाउलो डिबाला युभेन्ट्ससंग सम्झौता नविकरणको बिषयमा आन्तरिक गृहकार्य अघि बढाएका छन् ।

डिबालामाथि प्रिमियर लिग क्लब म्यान्चेष्टर युनाईटेडले अनुबन्धको ईच्छा देखाईरहेको छ । तर अर्जेन्टिनी फरवार्ड भने टुरिन क्लबसंग सम्झौता नविकरणका लागि आन्तरिक छलफलमा रहेका छन् ।

युभेन्ट्सले डिबाला धेरै वर्षसम्म क्लबमा रहेको हेर्न चाहेको बताएको छ ।

२६ वर्षका फरवार्ड भर्खरै मात्र कोरोनाबाट संक्रमित बनेका छन् । उनलाई पछिल्ला ६ हप्तामा ४ पटक परिक्षण गर्दा समेत कोरोना संक्रमण पोजेटिभ देखिएको छ । ईटालियन च्याम्पियन क्लबले युनाईटेडका पाउल पोग्बासंग डिबाला साटफेर हुन सक्ने सम्भावनालाई समेत अस्विकार गरिदिएको छ ।

अर्जेन्टिनाका स्टार डिबाला युभेन्ट्सका लिजेन्ड बन्न चाहन्छन् । कोरोनाका कारण प्रभावित बनेको फुटबल सिजन अगाडी डिबालाले नयाँ गन्तव्यको बिषयमा टुङ्गो लगाउनुपर्नेछ ।

युभेन्ट्सका खेल निर्देशक फाबियो पाराटिचीले डिबालाको सम्झौता नविकरणको बिषयमा आन्तरिक गृहकार्य भईरहेको बताएका छन् ।

'हामी उनलाई युभेन्ट्सको धेरै वर्षको हिस्सा बनाउन चाहन्छौ ।' उनले भनेका छन् ।

डिबालाले यस सिजन युभेन्ट्सका लागि ३४ खेलमा १३ गोल गर्नुकासाथै १२ गोलको अवसर सिर्जना गरेका थिए । उनलाई प्रिमियर लिग क्लब युनाईटेडसंगै टोटेनहमले समेत अनुबन्धमा चासो देखाईरहेको थियो ।

उनी क्लबमा क्रिस्टियानो रोनाल्डोको सहकर्मीको रुपमा खेलिरहेका छन् । कोरानाबाट उनी मुक्त हुने बित्तिकै नयाँ सम्झौताको बिषय टुङ्गो लाग्ने बताईएको छ । केही हप्ता अघि उनीले घरमै शारीरिक अभ्यास गरेको तस्विर पोस्ट गरेका थिए ।

उनी पाँच वर्ष अघि ३५ मिलियन पाउण्डमा युभेन्ट्ससंग जोडिएका थिए । उनले क्लबका लागि २ सय १६ खेलमा ९१ गोल गर्नुका साथै ३६ गोलका अवसर सिर्जना गरेका थिए ।