काठमाडौं । कोरोना भाईरसको महामारीबाट बच्न सरकारले देशभर लकडाउन लगाएको छ ।
सरकारले लकडाउन लगाएसँगै नेपाली राष्ट्रिय महिला क्रिकेट टिमकी उपकप्तान सीता राना मगरको दिनचर्या समेत सामान्य बितिरहेको छ ।
लकडाउनसँगै दैनिक मैदानमा देखिने सीताको दैनिकी घरमै सिमित भएको छ । सीताको दैनिकी समेत बदलिएको छ ।
लकडाउनसँगै ढिला उठ्ने बानी परेको सीताको दैनिकी योगाबाट सुरु हुन्छ ।
'लकडाउनले गर्दा अलि ढिलो उठ्ने भाको छु । उठेर योगा गर्छु,' लकडाउनपछिका आफ्नो दैनिकीबारे सीताले भनिन्, 'त्यसपछी घरको काम हुन्छ । खाना बनाउँछु । दिउँसो परिवारसँग बित्छ । बेलुका फुलबडी वर्क आउट गर्ने गरेको छु ।'
लकडाउन नहुँदा सीताको दैनिकी मैदानमा बित्थ्यो । प्राय उनी क्रिकेटमा व्यस्त हुने गर्थिन् । तर, कोरोनाको महामारीसँगै सीताले मैदान टेक्न पाएकी छैनन् । प्रशिक्षण गर्न पाएकी छैनन् । त्यसैले सीता अहिले क्रिकेटलाई निकै मिस गर्ने गरेकी छिन् ।
'अवस्था सामान्य भएपछि क्रिकेटलाई निरन्तरता दिन्छु । लामो समय भएको छ । त्यसैले ब्याटिङ, फिल्डिङ र क्रिकेटलाई मिस गरेको छु,' उनले भनिन् ।
क्रिकेटसँगै रेस्टुरेन्टको खाना समेत मिस गर्ने गरेको सीताले सुनाइन् । लकडाउन खुल्नसाथ रेस्टुरेन्ट गएर खाना खाने योजना पनि उनले सुनाईन् ।
'रेस्टुरेन्टको खाना पनि धेरै मिस गरेको छु । लकडाउन खुल्ने बित्तिकै रेस्टुरेन्ट गएर खान मन छ । घरको खाँदा खाँदा वाक्क लागि सक्यो,' उनले थपिन् ।
लामो समय क्रिकेटबाट टाढा हुँदा करियरमा समेत असर गरेको सीताले बताईन् ।
'खुलेर गर्नु पर्ने अभ्यास गर्न पाइएको छैन । सामान्य फिटनेस गरेपनि दौडिन पाइएको छैन । मुख्य त हाम्रो फिल्डिङमा सुधार गर्नु पर्ने थियो । अभ्यास नै गर्न पाइएको छैन,' सीताले भनिन्, 'यसले (लकडाउन) क्रिकेट करियरमा ठुलो असर गर्छ ।'
लकडाउनसँगै आफ्नो फिटनेस खस्किएको चिन्ता छ उनलाई । तर, घरमै सीता सिमित साधनको प्रयोग गरेर सामान्य अभ्यास भने गर्ने गरेकी छिन् ।
'एक दुई हप्ता अभ्यास नगर्दा त गार्हो हुन्थ्यो । अहिले एक महिना बढी भईसक्यो । त्यसैले आफै घरमा सोली राखेर ब्याटिङ ड्रिल्स गर्ने गरेको छु । हात र आँखाको कोर्डिनेसन मिलाउन बल ट्याप गर्ने गरेको छु,' सीताले भनिन् ।
यहिँ मे महिनामा नेपाली महिला टिमले विश्वकप छनोट खेल्ने तय थियो । नेपालले त्यस छनोटमा राम्रो गर्ने योजना बनाएको थियो ।
'हामीलाई विश्वकप छनोट सुनौलो अवसर भएको कारण उत्सुकताका साथ कुर्दै थियौं । एसिया कपसँगै विश्वकपको ठुलो आश थियो । यस पटक त दुई राष्ट्र छनोट हुने भनिएको थियो । हामीले राम्रो गर्ने आशा गरेको थियौं,' सीताले भनिन् ।
तर, कोरोनाको कारण अन्तर्राष्ट्रिय क्रिकेट परिषद (आईसीसी) ले आगामी जुनसम्म क्रिकेट गतिविधि स्थगित गर्ने निर्णय गरिसकेको छ । त्यसैले विश्वकप छनोट समेत अन्योलमा रहेको छ ।
-1746755007.webp)
