काठमाडौं । पछिलो समय नेपाल क्रिकेटले टी-ट्वान्टीमा निरन्तर खराब प्रदर्शन गर्दै आइरहेको छ ।
सन् २०२० को टी-ट्वान्टी विश्वकप छनोट अन्तर्गतको एसिया फाइनलमा कमजोर राष्ट्र कतार र सिंगापुरसँग पराजित हुँदा ग्लोबल छनोटबाट बन्चित बनेको थियो ।
यस्तै सिंगापुर र ओमानमा भएको सिरिजमा नेपालले मिश्रीत नतिजा निकाल्यो । घरेलु भूमिमा भएको दक्षिण एसियाली खेलकुदमा नेपालले कास्य पदक हात पार्यो । उपाधि लक्ष्य रहेको प्रतियोगितामा नेपालले आफु भन्दा निकै कमजोर राष्ट्रलाई मात्रा पराजित गरेको थियो ।
थाइल्याण्डमा जारी एसीसी इस्टर्न रिजन पुरुष टी-ट्वान्टी कप क्रिकेटमा नेपालले सोचे अनुरुप प्रदर्शन गर्न सकेन । उपाधि लक्ष्यसहित थाइल्याण्ड पुगेको नेपाली टोली २ खेलमा पराजित हुँदा लक्ष्यबाट टाढियो र एसिया कप छनोटमा समेत स्थान बनाउन सकेन ।
पाँच राष्ट्र सहभागी प्रतियोगितामा शीर्ष दुई राष्ट्रले एसिया कप छनोटमा स्थान बनाउने समीकरणमा नेपाल १ जित निकाल्दा अंक तालिकाको पुछारबाट दोस्रो स्थानमा रह्यो ।
लगातार खस्किँदो प्रदर्शन देखाएको नेपालको भविष्यमाथि ठुलो प्रश्न चिन्न खडा भएको छ । कुनै समय टी-ट्वान्टी विश्वकपमा उत्कृष्ट प्रदर्शन गर्दै हाई हाई पाएको नेपाली टिमलाई निरन्तर खस्किएको प्रदर्शनपछि समर्थकले समेत विभिन्न आरोप लगाउन थालेका छन् ।
यसै विषयलाई लिएर नेपाल क्रिकेट संघ (क्यान) समेत निकै चिन्तित बनेको छ । नेपाली टिमको खराब प्रदर्शन रोक्न क्यानले नयाँ कदम चाल्ने भएको छ ।
मुख्यतया नेपाल क्रिकेट चुक्नुको कारण खोज्दै समाधानको लागि नयाँ कदम उठाउने तयारी भईरहेको क्यानका अध्यक्ष चतुर बहादुर चन्दले बताए ।
'आउने केहि हप्ता भित्र क्रिकेट खेलाडी, क्यान पधाधिकारी र सरोकारवालासँग बसेर छलफल गर्ने छौं,' अध्यक्ष चन्दले खेलपाटीसँग भने, 'प्रदर्शन खस्किँदा हामी चुप लाग्नेवाला छैनौं । अहिलेसम्म भएको खेलको समिक्षा गर्दै त्यसको सहि कदम चाल्ने छौं ।'
यस्तै इस्टर्न रिजनको नतिजाबारे समेत क्यानले छुट्टै समिक्षा गर्नेछ । नेपाली टिम फर्किएपछी टिम म्यानेजरको रिपोर्ट बुझ्दै क्यानले थप कदम चाल्ने चन्दले जानकारी गराए ।
थाइल्याण्डबाट नेपाली टिम शनिबार दिउँसो नेपाल आइपुग्ने छ ।
हालै मात्र भारतीय मूलका मुख्य प्रशिक्षक उमेस पटवाकले प्रशिक्षणबाट राजिनामा दिएका थिए । फलस्वरूप नेपालले अन्तरिम प्रशिक्षक जगत टमटाले इस्टर्न रिजनको लागि जिम्मेवारी दिइएको थियो ।
यस्तै नेपाल क्रिकेट संघ (क्यान) ले नयाँ प्रशिक्षकको खोजी समेत गर्दै आइरहेको छ । प्रतिस्पर्धात्मक प्रतियोगिता नभएको भन्दै आरामले प्रशिक्षक खोजी गर्दै आएको क्यानलाई अब दबाब बढेको छ ।
आउने महिना नेपालले आईसीसी विश्वकप लिग-२ अन्तर्गतको त्रिदेशीय एकदिवसीय क्रिकेट सिरिजमा स्कटल्याण्ड र नामिबियासँग खेल्दै छ । त्यस बाहेक नेपालले नामिबिया भ्रमणमा टी ट्वान्टी सिरिज खेल्ने बलियो सम्भावना समेत रहेको छ ।
विश्वकप छनोटको पहिलो चरणको रुपमा रहेको लिग-२ नेपालको लागि निकै महत्पूर्ण रहेको छ । ७ राष्ट्रले ३६ एक दिवसीय अन्तराष्ट्रिय खेल खेलिने प्रतियोगितामा शिर्ष ३ राष्ट्रले सिधै विश्वकप छनोटमा स्थान बनाउने छन् ।
तर, नेपालले पछिल्लो समय कुनै प्रतियोगितामा पनि स्थिर प्रदर्शन गर्न नसक्दा नेपाल क्रिकेटको भविष्य अन्योलमा देखिएको छ ।
