काठमाडौं । एसीसी ईस्टर्न रिजन पुरुष टी–ट्वान्टी कप क्रिकेटको दोस्रो खेलमा नेपालले हङकङबिरुद्ध टस जितेर फिल्डिङ रोजेको छ ।
थाईल्याण्डको बैंंककमा कप्तान ज्ञानेन्द्र मल्लले टस जितेर पहिले फिल्डिङ गर्ने निर्णय लिएका हुन् ।
नेपाली टिमले टिमको लाईन अपमा केही परिवर्तन गरेको छ । ओपनिङमा कप्तान ज्ञानेन्द्रसंग दिपेन्द्र सिंह ऐरी देखिएका छन् ।
यस्तै, पारस खड्का, विनोद भण्डारी, आरिफ शेख, करण केसी, सन्दीप लामिछाने, अभिनाश बोहरा, कुशल मल्ल, सुसन भारी, पवन सरार्फलाई प्लेईङ सेटमा राखिएको छ ।
औसत बलिङ र कमजोर ब्याटिङको कारण नेपाल पहिलो खेलमा मलेसियासंग २२ रनले पराजित भएको थियो ।
हेड टू हेड
टी–ट्वान्टीमा मात्र दुवै टोली ८ पटक भिडेका छन् । जसमा नेपाल र हङकङले समान ४-४ पटक विजयी भएका छन् ।
पहिलो पटक नेपाल र हङकङबीच सन् २०१० को एसियन गेम्समा प्रतिस्पर्धा भएको थियो । पहिले ब्याटिङ गरेको हङकङले निर्धारित २० ओभरमा ७ विकेट गुमाएर १ सय १५ रन बनाएको थियो ।
जवाफमा नेपालले २० ओभरमा ९ विकेट गुमाएर मात्र ८५ रन बनाउन सक्यो र खेलमा ३० रनको हार व्यहोरेको थियो ।
दोस्रो भेट सन् २०१२ को आईसीसी विश्व टी–ट्वान्टी छनोटमा भएको थियो । टस जितेर पहिले ब्याटिङ गरेको नेपालले कप्तान पारसको अर्धशतकीय इनिङमा ६ विकेट गुमाएर १ सय ३० रन बनाएको थियो ।
हङकङले जवाफमा ९ विकेट गुमाएर मात्र १ सय २ रन बनायो र नेपाल खेलमा २८ रनले विजयी भयो ।
सन् २०१३ को एसीसी टी–ट्वान्टी कपमा नेपाल हङकङसँग ६ विकेटले पराजित भयो । नेपालले दिएको १ सय १५ रनको लक्ष्य हङकङले १६ ओभर ३ बलमा मात्र ४ विकेट गुमाएर पुरा गर्यो ।
यस्तै सन् २०१३ को आईसीसी विश्व टी–ट्वान्टी छनोटमा पुन नेपालले हङकङ माथि विजयी हात पार्यो । हङकङले दिएको १ सय ४४ रनको लक्ष्य नेपालले अन्तिम बलमा ५ विकेट गुमाएर पुरा गर्यो ।
रोमाञ्चक खेलमा कप्तान पारसले ४६ रन बनाउँदा रन आउट भए भने ज्ञानेन्द्र मल्लले ३० तथा सागर पुनले २२ रनको योगदान गरे ।
सन् २०१४ को आईसीसी विश्व टी–ट्वान्टीमा पहिलो खेलमा नेपालले हङकङलाई ८० रनले पराजित गर्दै पहिलो टी–ट्वान्टी अन्तराष्ट्रिय खेलमा ऐतिहासिक जित हात पार्यो ।
नेपालले दिएको १ सय ५० रनको लक्ष्य पछ्याएको हङकङ १७ ओभरमा ६९ रन बनाउँदा अल आउट भएको थियो ।
सन् २०१४ को श्रीलंका भ्रमण गरेको नेपाल र हङकङले ५ मैत्रीपूर्ण खेल खेल्ने तालिका भएपनि खराब मौषमका कारण मात्र एक खेलेको थियो । चौंथो खेलमा पहिले ब्याटिङ गरेको नेपालले २० ओभरमा पुरै विकेट गुमाएर मात्र ७२ रन बनायो ।
जवाफमा ब्याटिङ गरेको हङकङले १ बल बाँकी रहँदा ८ विकेट गुमाएर लक्ष्य पुरा गर्यो । चौंथो खेलमा २ विकेटको जित निकालेको हङकङले सिरिज १–० ले जितेको थियो ।
यस्तै आईसीसी विश्वकप टी–ट्वान्टी छनोट अन्तर्गत भएको खेलमा हङकङ ५ विकेटले विजयी भएको थियो । नेपालले दिएको १ सय १० रनको सामान्य लक्ष्य हङकङले १९ ओभर १ बलमा ५ विकेट गुमाएर पुरा गरेको थियो ।
पछिल्लो पटक नेपाल र हङकङले ओमानमा गत वर्ष भएको पाँच देशीय सिरिजमा खेलेका थिए । खेलमा नेपाल ४ विकेटले विजयी भएको थियो । १ सय २६ रनको लक्ष्य पछ्याएको नेपालले बिनोद भण्डारीको अर्धशतकमा सहज जित निकालेको थियो ।
प्रतियोगितामा नेपाल सहित मलेसिया, थाईल्याण्ड, सिंगापुर र हङकङ समावेश छन् । रोउण्ड रोबिनका आधारमा चल्ने प्रतियोगिताका शीर्ष दुई टोलीले एसिया कप छनोटमा स्थान बनाउने छन् ।
