कसरी छनोट गर्दैछ क्यानले नयाँ प्रशिक्षक ?

काठमाडौं । नेपाली क्रिकेट टिमलाई हालसम्म १३ विदेशी प्रशिक्षकले प्रशिक्षण दिएका छन् । केहि मुख्य प्रशिक्षकको रुपमा क्रिकेट टिमसँग जोडिए भने केहि छोटो समयका लागि कन्सल्ट्यान्टका रुपमा रहे ।

नेपालको टिमलाई भारत, इंग्ल्यान्ड, अष्ट्रेलिया, श्रीलंका, पाकिस्तान जस्ता टेष्ट राष्ट्रका प्रशिक्षकले प्रशिक्षण दिईसकेका छन् ।

यसै महिना भारतीय प्रशिक्षक उमेश पटवालले राष्ट्रिय क्रिकेट टिमको मुख्य प्रशिक्षकको जिम्मेवारी छाडेका थिए । राष्ट्रिय खेलकुद परिषद (राखेप) र अन्तराष्ट्रिय क्रिकेट परिषद (आईसीसी) को संयुक्त प्रयासमा पटवाल एक वर्षका लागि नेपालको मुख्य प्रशिक्षकमा नियुक्त भएका थिए ।

नेपाल क्रिकेट संघ (क्यान) आईसीसीको निलम्बनमा रहेको समय पटवालको नेपाल आगमन भएको थियो । नेपालको ब्याटिङ कन्सल्ट्यान्ट, पोखरा प्रिमियर लिग (पीपीएल) को निर्देशक हुँदै उनी मुख्य प्रशिक्षक बनेका थिए ।

तर, आफ्नो कार्यकाल सकिन केहि महिना रहेको अवस्थामा पटवालले राजिनामा बुझाएर भारत फर्किएका थिए । एक महिना अगाबै आईसीसीमा राजिनामा पत्र बुझाएका पटवालले नेपाली भूमिमा आयोजना भएको विश्वकप क्रिकेट लिग-२ अन्तर्गतको सिरिजसँगै आफ्नो कार्यकाल सकिने उल्लेख गरेका थिए ।

पटवाल स्वदेश फर्किएसँगै क्यानले तत्कालको लागि जगत टमाटालाई नेपाली टिमको प्रशिक्षक बनाएको थियो । थाइल्याण्डमा शनिबार सुरु हुने एसीसी ईस्टर्न रिजन पुरुष टी-ट्वान्टी कपमा नेपाली टिम टमटाले नै हेर्ने छन् ।

पटवालको राजिनामासँगै टमटालाई मुख्य प्रशिक्षकको जिम्मेवारी दिएपनि क्यान नयाँ प्रशिक्षकको खोजीमा रहेको छ ।

एकदिवसीय मान्यता प्राप्त नेपालको प्रशिक्षक अब को बन्छन् ? कहिले आउँछन् र कुन देशका आउछन् ? जस्ता प्रश्न क्रिकेट समर्थक र सरोकारवालाको कौतुहलताको विषय बनेको छ ।

कसरी छनोट गरिन्छ प्रशिक्षक ?

क्यानका सचिव अशोकनाथ प्याकुरेलको अनुसार नेपालको प्रशिक्षक नियुक्तिको लागि क्यानले आईसीसी र एसीसीसँग सहयोग लिनेछ । जसमा आईसीसी र एसीसीले छनोट गरेको केहि प्रशिक्षकको नामावली क्यानलाई बुझाउने छ ।

आईसीसी र एसीसीले क्यानलाई पठाएको प्रशिक्षकको नामावालीबाट क्यानले ती प्रशिक्षकसँग बसेर अन्तर्वार्ता गर्नेछ । अन्तर्वार्ताको लागि क्यानले एक छुट्टै प्रशिक्षक छनोट समिति गठन गर्नेछ ।

प्रशिक्षक र प्रशिक्षक छनोट समितिबीच प्रशिक्षकको माग देखि क्यानले चाहेको उपयुक्त प्रशिक्षकको सबै कुरा भएपछि क्यानले नेपाल क्रिकेटको लागि नयाँ प्रशिक्षक नियुक्त गर्नेछ ।

यसको विकल्पमा क्यानले आईसीसी र एसीसी लगायतमा प्रशिक्षक आवश्यकताको विज्ञापन गर्ने समेत सोचेको छ । नेपालको प्रशिक्षकमा नियुक्त हुन चाहेका प्रशिक्षकले विज्ञापनको फारम भर्नु पर्नेछ ।

फारम भरेका प्रशिक्षक मध्ये क्यानको प्रशिक्षक छनोट समितिले अन्तर्वार्ता लिंदै उपयुक्त प्रशिक्षक नियुक्त गर्नेछ ।

कस्तो प्रशिक्षक ?

हाल क्यानले आईसीसी र एसीसीलाई यो देशको प्रशिक्षक प्रदान गर्न भनेर तोकेको छैन । मात्र खेलाडीसँग भाषामा अफ्ठ्यारो नपर्ने र एकदिवसीय राष्ट्रको विराशत कायम राख्न सक्ने प्रशिक्षकको माग क्यानले राखेको छ ।

कुन देशको प्रशिक्षक ?

नेपालले सकेसम्म भारत र श्रीलंकाबाट प्रशिक्षक पाए सहज हुने धारणा प्रस्तुत गरेको छ । तर, भारतका स्तरीय प्रशिक्षकको पारिश्रमिक निकै महँगो हुने र उनीहरु निकै व्यस्त हुने भएका कारण भारतबाट प्रशिक्षक आउने सम्भाबना न्यून रहेको छ ।

नेपालको लागि दक्षिण अफ्रिकाबाट समेत प्रशिक्षक आउन सक्ने छन् । क्यान र आईसीसीको छलफलमा दक्षिण अफ्रिकी प्रशिक्षकको समेत कुरा हुने गरेको छ ।

कहिले आउछन् नयाँ प्रशिक्षक ?

हाल नेपाल एसीसी इस्टर्न रिजन क्रिकेटको लागि थाईल्याण्डमा रहेको छ । नेपालको मुख्य प्रशिक्षकको जिम्मा नेपालका जगत टमाटाले पाएका छन् । केहि समय नेपालको खासै ठूलो प्रतियोगिता नभएको कारण क्यानले समेत हतार गरेको छैन ।

क्यानले कम्तिमा थाइल्याण्ड भ्रमण नसकिएसम्म नेपालको नयाँ प्रशिक्षक सार्वजनिक गर्ने छैन । प्रतियोगिता सकिएपछि मात्र नेपालले केहि समय लिएर पूर्ण रुपमा प्रशिक्षकको खोजीमा लाग्नेछ ।