कोरोनाबाट बच्न नेपाली खेलाडीलाई 'एन-९५' माक्स

काठमाडौं । एसीसी ईस्टर्न रिजन पुरुष टी-ट्वान्टी कप क्रिकेटमा सहभागिता जनाउने नेपाली राष्ट्रिय टिम आज (बिहिबार) थाइल्याण्ड जाँदै छन् ।

प्रतियोगिताको उपाधि जित्ने लक्ष्य लिएको नेपाली टिम लायन एयरवेजबाट दिउँसो ३ बजे त्यसतर्फ प्रस्थान गर्ने छन् ।

चीनमा महामारीको रूप लिएको र विश्वका थुप्रै देशमा फैलिदै गरेको कोरोना भाइरस प्रतियोगिता आयोजक थाइल्याण्डमा समेत देखिएको छ ।

कोरोनाले गर्दा प्रतियोगिता र आयोजकमा प्रश्न उठेको थियो । किनभने प्रतियोगितामा सहभागी देशमा कोरोना संक्रमित संख्या बढ्दो छ । आयोजक थाइल्यान्डमा ३७ जनामा कोरोनाको संक्रमण भेटिएको छ ।

कोरोनाका कारण प्रतियोगिता समेत दुई हप्ता अघिसम्म हुने वा नहुने निश्चित थिएन । एसियन क्रिकेट काउन्सिल र थाइल्याण्ड क्रिकेट संघले स्थानीय स्वास्थ्य अधिकारीसँग छलफल गर्दै प्रतियोगिता आयोजना गर्न कुनै समस्या नहुने बताएपछि प्रतियोगिता हुने निश्चित भएको थियो ।

तर, कोरोनाकै कारण चीन, भुटान र म्यानमारले प्रतियोगिताबाट नाम फिर्ता लिएका थिए ।

होटल र प्रतियोगिता स्थल बाहेक अन्य ठाउँमा जान नपर्ने भएको कारण प्रतियोगितामा सहभागी टिमका खेलाडीलाई कोरोना सर्ने डर निकै कम रहेको बताईएको छ । तर, कोरोनाबाट बच्न नेपाली टिमले पनि सावधानी अपनाउने भएको छ ।

यस्तै कोरोनाको संक्रमणबाट जोगिन नेपाली टिमका खेलाडीले 'एन-९५' माक्सको प्रयोग गर्नेछ ।

'कोरोनाबाट बच्न नेपाली टिमले 'एन-९५ नाइन फाइभ' माक्सको प्रयोग गर्नेछन्,' राष्ट्रिय टिमका फिजियो बिक्रम न्यौपानेले खेलपाटीलाई भने, 'सबैले एयरपोर्ट देखि होटल जाँदा र होटलबाट खेल मैदान यो मास्कको प्रयोग गर्ने छन् ।'

प्रतियोगितामा नेपालसहित थाइल्याण्ड, मलेसिया, सिंगापुर र हङकङले प्रतिस्पर्धा गर्ने छन् ।

एसियन क्रिकेट काउन्सिल (एसीसी) ले आयोजना गर्ने यस प्रतियोगिता एसिया कप छनोट पनि हो । प्रतियोगिताको शीर्ष दुई टोलीले एसिया कप छनोटमा स्थान बनाउने छन् ।

नेपालले फेब्रुवरी २९ मा मलेसियासँग खेल्दै प्रतियोगिताको सुरुवात गर्नेछ । यस्तै मार्च १ मा हङकङसँग खेल्दा मार्च ४ मा थाइल्याण्डसँग खेल्नेछ । नेपालले अन्तिम खेलमा मार्च ६ मा सिंगापुरसँग खेल्नेछ ।