पीपीएल : सर्वाधिक रन बनाउने नेपाली ब्याट्सम्यान

काठमाडौं । दोस्रो संस्करणको पोखरा प्रिमियर लिग (पीपीएल) टी-ट्वान्टी क्रिकेट शनिबार सकिएको छ । फाइनलमा विराटनगर टाइटन्सलाई ३२ रनले पराजित गर्दै चितवन राइनोजले पहिलो पटक उपाधि उचाल्यो ।

पोखरा रंगशालामा सकिएको पीपीएलमा सर्वाधिक रन बनाउने शीर्ष १० खेलाडीको सूचीमा विजेता टिमबाट ४ खेलाडी अटाएका छन् ।

तर, पीपीएलमा नेपाली भन्दा विदेशी ब्याट्सम्याननै हाबी देखिए । सर्वाधिक रन बनाउने खेलाडीको शीर्ष ५ भित्र मात्र एक नेपालीले स्थान बनाउन सफल भए ।

पीपीएलमा सर्वाधिक रन बनाउने नेपाली खेलाडी ?

१. ज्ञानेन्द्र मल्ल

काठमाडौं गोल्डेनका कप्तान ज्ञानेन्द्र मल्ल यस संस्करणको पीपीएलमा सर्वाधिक रन बनाउने नेपाली खेलाडीको शीर्ष स्थानमा रहे । प्रतियोगिताको एक मात्र शतक प्रहार गर्ने खेलाडी मल्लले ५ खेलमा २ सय १ रन बनाउन सफल रहे ।

लिग चरणको खेलमा धनगढी ब्लुजविरुद्ध आक्रामक ब्याटिङ गरेका मल्लले कीर्तिमानी शतक प्रहार गरेका थिए । नेपाली घरेलु फ्रेन्चाइज क्रिकेटमा मल्ल सर्वाधिक छिटो शतक प्रहार गर्ने खेलाडी हुन् ।

मल्लले मात्र ३८ बलमा ८ चौका र ९ छक्का प्रहर गर्दै शतक बनाएका थिए ।

प्रतियोगितामा मल्ल सर्वाधिक छक्का प्रहार गर्ने खेलाडी हुन् । २९ बाउन्ड्री हानेका मल्लले १३ छक्का प्रहार गरेका थिए जुन एक खेलाडीले प्रहार गरेको छक्का सर्वाधिक हो । मल्लसँगै अन्य २ खेलाडीले समेत १३ छक्का प्रहार गरेका छन् ।

यस पिपीएलमा मल्ल २ सय रन प्रहार गर्ने एक्लो नेपाली खेलाडी हुन् ।

२. आरिफ शेख

चितवनलाई पहिलो पटक पीपीएल च्याम्पियन बनाउन आरिफले महत्वपूर्ण भूमिका खेलेका थिए । आरिफले चितवनका लागि ब्याटिङ मात्र नभएर फिल्डिङमा समेत उत्कृष्ट प्रदर्शन गरे ।

आरिफले पीपीएलमा ६ खेल खेल्दा १ सय ६१ रन बनाए । ४० दशमलब २५ को औसतमा ब्याटिङ गरेका आरिफको १ सय ८५ को स्ट्राइक रेट रह्यो ।

मल्लसंगै आरिफ समेत लिगमा सर्वाधिक छक्का प्रहार गर्ने खेलाडीको रुपमा रहे । उनले लिगमा ९ छक्का प्रहार गरे । राष्ट्रिय टिममा समेत आरिफ पछिल्लो समय राम्रो लयमा रहेका छन् ।

३. पारस खड्का

उपाधि विजेता टिमका कप्तान पारस खड्का लिगमा सर्वाधिक रन बनाउने तेस्रो नेपाली खेलाडी हुन् । लिगमा १ अर्धशतक सहित ५ इनिङ्समा पारसले १ सय ५० रन बनाए ।

६ खेल खेलेका पारसले १ खेलमा ब्याटिङ गर्ने पालो पाएनन् । प्रतियोगितामा पारसले १७ चौका र ४ छक्का प्रहार गरेका थिए ।

पारस नेपालमा आयोजना हुने तीनवटै फ्रेन्चाइज टी-ट्वान्टी क्रिकेट जित्ने पहिलो कप्तान हुन् ।

४. दिपेन्द्र सिंह ऐरी

धनगढी ब्लुजका कप्तान दिपेन्द्र पीपीएलमा सर्वाधिक रन बनाउने चौथो नेपाली खेलाडी हुन् । ५ खेलमा उनले २६ दशमलब २० को औसतमा १ सय ३१ रन बनाए ।

प्रतियोगितामा दिपेन्द्रले अर्धशतक समेत बनाएका थिए ।

५. प्रदिप सिंह ऐरी

प्रतियोगिताको उपविजेता टिम विराटनगरका कप्तान प्रदिप सिंह ऐरी पीपीएलमा सर्वाधिक रन बनाउने पाँचौं नेपाली खेलाडी हुन् ।

प्रदिपले ७ खेलमा २१ को औसतमा १ सय २८ रन बनाएका थिए । यस्तै प्रदिपले पहिलो पटक फ्रेन्चाइज टिमको कप्तानी गरेका हुन् ।