कुस्तीमा नेपाललाई चार पदक

काठमाडौं । १३ औं दक्षिण एसियाली खेलकुद प्रतियोगिता (साग) अन्तर्गत कुस्तीमा आइतबार नेपालले दुई रजत र दुई कांस्य पदक जितेको छ ।

शनिबार नेपालकी संगीता धामीले नेपाललाई ऐतिहासिक स्वर्ण दिलाएकी थिइन् । आइतबार भारतले चार, श्रीलंकाले दुई र पाकिस्तानले एक स्वर्ण पदक हात पारे ।

जनकपुरधामस्थित कभर्डहलमा भएको ६१ केजी तौलसमूहमा भारतका रवीन्द्रले स्वर्ण, मोहम्मद बिलालले रजत र श्रीलंकाका उद्रले कांस्य पदक हात पारे । ८६ केजी तौलसमूहमा भारतका पवन कुमारले स्वर्ण, पाकिस्तानका उमर अहमदले रजत र बंगलादेशका श्री श्रोत रोयले कांस्य पदक जिते । ९२ केजी तौलसमूहमा पाकिस्तानका मोहम्मद इनामले स्वर्ण, श्रीलंकाका सलिथाले रजत र नेपालका सुमिर साहले कांस्य जित्न सफल भए ।

यसैगरी महिलातर्फ ५९ केजीमा भारतकी अंशुले स्वर्ण, बंगलादेशकी निपा एरियनले रजत र नेपालकी कोमल खत्रीले कांस्य पदक पाए । महिला ६२ केजी तौलसमूहमा भारतकी साक्षी मल्लिकले स्वर्ण, श्रीलंकाकी महिराले रजत र बंगलादेशकी अख्तर शरमनले कांस्य जिते । महिला ६५ केजी तौलसमूहमा श्रीलंकाकी एस. दिलहानीले स्वर्ण, नेपालकी सुशीला चन्दले रजत र बंगलादेशकी मोस लक्कीले कांस्य हात पारे ।

यसैगरी महिलाकै ७२ केजी तौलसमूहमा श्रीलंकाकी एभोले स्वर्ण, नेपालकी निर्मला जाग्रीले रजत र बंगलादेशकी अख्तर रोजिनाले कांस्य पदक जित्न सफल भए । आइतबारको खेलसँगै भारतले १२, पाकिस्तानले तीन, श्रीलंकाले दुई र नेपालले एक स्वर्ण पदक जितेका छन् । सोमबार दुई स्वर्ण पदकका लागि खेल हुनेछ ।