साइक्लिङमा वुद्धिले जिते स्वर्ण, सर्वाधिक स्वर्णको कीर्तिमान !

काठमाडौं । नेपालमा जारी १३ औं दक्षिण एसियाली खेलकुद प्रतियोगिता (साग)  अन्तर्गत साइक्लिङको क्रस कन्ट्री पुरुषमा नेपालले स्वर्ण जितेको छ ।

गोकर्णेश्वर नगरपालिकास्थित राष्ट्रिय सहिद एवम् शान्ति पार्कमा बिहिबार नेपालका वुद्धि बहादुर तामाङले स्वर्ण जितेका हुन् ।

क्रस कन्ट्रीको ४ किमिको ४ ल्यापमा वुद्धिले १ घण्टा १९ मिनेट ०८ सेकेण्डको समय निकाले  ।

यस्तै नेपालका राजिब राईले रजत र नेपालकै ओकेश राज बज्राचार्यले कास्य जितेका छन् । राजिबले १ घण्टा १९ मिनेट ४० सेकेण्ड र ओकेशले १ घण्टा २१ मिनेटको समय निकाले ।

महिलातर्फ नेपालकै लक्ष्मी मगरले स्वर्ण जित्दा उषा खनालले रजत जितेकी थिइन् ।

वुद्धिले स्वर्ण जितेसँगै नेपालले साग इतिहासको एकै संस्करणमा सर्वाधिक स्वर्णको कीर्तिमान बनाएको छ ।

नेपालले साग इतिहासमा पहिलोपटक ३२ स्वर्ण जितेको हो ।

नेपालले यस अघि नेपालमै भएको आठौं सागमा सर्वाधिक ३१ स्वर्ण जितेको थियो  ।