पहिलो खेलमै नेपाल पराजित

काठमाडौं । घरेलु भूमिमा जारी १३ औं दक्षिण एसियाली खेलकुद (साग) अन्तर्गत पुरुष भलिबलको पहिलो खेलमा नेपाल पराजित भएको छ ।

त्रिपुरेश्वरस्थित राखेप कभर्ड हलमा बुधबार भएको पहिलो खेलमा नेपाल बंगलादेशसँग ३-२ को प्रतिस्पर्धात्मक सेटमा पराजित भएको हो ।

निकै रोमान्चक बनेको खेलमा नेपालले पहिलो सेट २५-२१ ले जितेको थियो । तर, नेपालले दोस्रो सेट २५-२३ ले गुमाएको थियो ।

घरेलु समर्थकको साथ पाएको नेपालले तेस्रो सेट २५-१९ ले जित्दै पुन खेलमा २-१ को अग्रता बनाएको थियो ।

तर, चौंथो सेटमा बंगलादेशले २६-२५ को जित निकालेपछि खेल २-२ सेटको स्थितिमा पुगेको थियो ।

त्यसपछि खेलको अन्तिम तथा निर्णायक सेटमा १५-१२ ले जित्दै बंगलादेशले नेपाललाई ३-२ को सेटमा स्तब्ध बनायो ।

प्रतिस्पर्धात्मक बनेको खेलमा धन बहादुर भट्टले २१ अंक जोडेपनि नेपाललाई जित दिलाउन सकेनन् । यस्तै नेपालका लागि हरि अधिकारीले १७ र राजेन्द्र बिष्टले १२ अंक जोडे ।

अब नेपालले समूह चरणको अन्तिम तथा तेस्रो खेलमा भारतसँग शुक्रबार खेल्नेछ । सेमिफाइनलमा पुग्न नेपाललाई भारतविरुद्धको खेल जित्नै पर्ने दबाब समेत थपिएको छ ।

नेपाललाई हराएसँगै बंगलादेश भने सेमिफाइनल नजिक पुगेको छ । समूह 'ए' मा रहेको बंगलादेशले २ अंक जोडेको छ ।

६ राष्ट्र सहभागी पुरुष भलिबलमा दुई समूहको शीर्ष दुई टिम सेमिफाइनलमा पुग्ने छन् ।

महिला भलिबलमा भने नेपालले विजयी सुरुवात गरेको छ । नेपालले पहिलो खेलमा बंगलादेशलाई ३-० को सेटमा हराएको थियो ।

नेपालले बंगलादेशमाथि २५-९, २५-९ र २५-११ ले हराएको थियो ।