करण र सावित्रालाई 'प्रतिभा सम्मान'

काठमाडौं । राष्ट्रिय क्रिकेट टिमका सदस्य करण केसी र महिला फुटबल टिमकी स्ट्राइकर सावित्रा भण्डारी राष्ट्रिय खेलकुद प्रतिभा सम्मान पुरस्कारबाट सम्मानित भएका छन् ।

युवा तथा खेलकुद मन्त्रालयले बुधबार करण र सावित्रालाई प्रतिभा सम्मानले सम्मानित गरेको हो । यस्तै शारीरिक सुगठनकी रजनी श्रेष्ठ, तेक्वान्दोका भुवन सार्की, पारा क्रिकेटका हिमाल अर्याल, करातेका अनु अधिकारी र विक बहादुर थामी पनि सम्मानित भए ।

यस्तै भलिबल प्रशिक्षक जगदिश भट्ट, निर्णायक सुदिश पाण्डे , ब्यवस्थापकमा प्याराग्लाइडिङका शैलेन्द्र राउत पनि प्रतिभा सम्मानबाट सम्मानित भए ।

त्यस्तै खेलकुद प्रतिभा सम्मानबाट नेपाल ब्याडमिन्टन संघ सम्मानित भएको छ ।

पुरस्कृत हुनेले नगद १ लाख सहित प्रशंसा पत्र प्राप्त गरे । खेलाडीतर्फ अनु अधिकारी र विक बहादुर थामीले ५०÷५० हजार प्राप्त गरे ।

पुरस्कार छनोट समितिले दिईएको अंकका आधारमा दुवैले समान अंक प्राप्त गरेकाले दुवैलाई ५०÷५० हजार प्रदान गरिएको समितिका सदस्यले जानकारी गराए ।

युवा तथा खेलकुद मन्त्री जगतबहादुर सुनार बिश्वकर्माले मन्त्रालयमा आयोजित कार्यक्रममा खेलाडी, प्रशिक्षक र संघलाई पुरस्कृत गरे ।