सागको ‘साख’ जोगाउन गम्भीर बनौं

काठमाडौं । १३ औं दक्षिण एसियाली खेलकुद प्रतियोगिता (साग)को दिन गन्ती सुरु भएको छ । अब खेल सुरु हुन ठ्याक्कै १४ दिन बाँकी छ । तर आयोजकको हिसाबले हाम्रा तयारीहरु बाँकीनै छन् ।

मुख्य खेल स्थलहरु निर्माणाधिन अवस्थामा छन् । कहिले सकिन्छन्, टुङ्गो छैन । आयोजकले हिसाबले नेपालको मुख्य पिरलो यही छ । दशरथ रंगशालामा छानो हान्ने काम सुरु भएको छैन, पोखरा रंगशाला बिजोगै देखिन्छ । सातदोबाटोको पौडी पोखरी अझै तयार भएको छैन ।

साग गराउने अर्जुनदृष्टि सहित सदस्य सचिवमा आएका रमेश सिलवालले कात्तिक १५ भित्र सबै पुर्वाधार तयार हुने दाबी गरेका थिए । तर निर्धारित समयमा समेत पुरा हुन नसकेपछि थप १५ दिनको भाका राखे । तर अवस्था जटिलै देखिन्छ । अझ बिजोग अवस्था बिषयगत समितिको छ । जति कम भएका छन्, धेरै कागजमै सिमित छन् । सागको दिन गन्ती सुरु हुदाँ समेत समितिले काम सक्यौ भन्ने अवस्था छैन । बैठक, समिक्षा अनि निर्देशनमै समितिका दिनहरु बितिरहेका छन् ।

१३ औं सागको सबै भन्दा राम्रो पक्ष राष्ट्रिय टिमको तयारी रह्यो । अधिकांश खेलले वैदेशिक प्रशिक्षण र अभ्यासको मौका पाए । स्वदेशमै भएका खेल र खेलाडीले विदेशी प्रशिक्षक पाए । सदस्य सचिव सिलवालले खेलाडीले गुनासो गर्ने कुनै बाटो राखेनन् । खेलाडीमा गरेको लगानी आसन्न सागको नतिजामा देखिनेनै छ । अर्को महत्वपुर्ण पक्ष भनेको निर्धारित समयमा बन्न निकै कठिन देखिएको दशरथ रंगशाला निर्माणमा खेलकुद मन्त्री आफै जुटे । सुरुमा निकै सुस्त देखिएका मन्त्री रातदिन खटिदाँ रंगशाला निर्माणको काम अन्तिम चरणमा पुगेको देखिन्छ ।

सागको सुरुवात हामीले गर्यो । खेलकुदमार्फत दक्षिण एसियालाई गोलबद्व गर्ने अभियानको थालनी जस हामीलाई जान्छ । तर आयोजनाको करिब चार दशक बितिसक्दा पनि हाम्रा सिकाई बिर्सन लायकनै रहे । १३ औ संस्करणको साग आयोजनाको १४ दिन अघिसम्म समेत हामी तयारी अवस्थामा बस्न सकेका छैनौ । धेरै कमजोर अघिल्ला राजनीतिक नेतृत्व र नियुक्तीका भए, केही क्रुटी वर्तमान नेतृत्वले देखाईरहेका छन् ।

तर साग खेलकुद कुनै ब्यक्ति बिशेष, संघ संस्था र मन्त्रालयको मात्र कार्यक्रम हैन । यो समग्र राष्ट्रको गौरवको कार्यक्रम हो । यससंग हाम्रो अनि राष्ट्रको मान, प्रतिष्ठा र ईज्जत जोडिएको छ । साग दक्षिण एसियाको खेल प्रतियोगिता मात्र हैन । यो हाम्रो जिवनशैली, संस्कृति र समृद्वि प्रकट गर्ने उत्कृष्ट थलो पनि हो । लामो राजनीतिक संक्रमण पार गरेर संघीय गणतन्त्रमा प्रवेश गरेको नेपालीले आफ्ना समृद्विको प्रयास र प्रयत्नलाई विश्व समुदायलाई देखाउने अवसर पनि हो । यसको अधिकतम उपयोग गर्ने दिशामा हामी जुट्नुपर्छ, लाग्नुपर्छ ।

सत्य यो पनि हो, राज्य सञ्चालनको प्रणालीसंग हाम्रा तमाम असहमती छन्, वर्तमान नेतृत्वसंग हाम्रा यथेष्ट गुनासाहरु छन् । केही मन्त्रीको कार्यशैलीसंग असन्तुष्टि होलान्, केही सदस्य सचिवका तिखा ब्यङ्गेसंग असन्तुष्टि होलान् । तर गुनासा, विवाद र आरोपमा उत्रने समय र छुट अब हामीलाई छैन । साग संघारमै आईपुगेको छ । यसलाई सफल बनाउने हामी सबै नागरिकको साझा दायित्व र कर्तव्य हो । बिषयको जटिलतालाई बुझेर सबै व्यक्ति र जिम्मेवार निकाय अब गम्भिर बन्न जरुरी छ । सागको शाख जोगाउनुपर्ने चुनौती छ । राष्ट्रको प्रतिष्ठा र गौरवसंग जोडिएको प्रतियोगितालाई सफल बनाउन सबैले आफ्नो क्षेत्रबाट सक्दो योगदान गर्न आवश्यक छ ।