टी-१० लिग : सन्दीप प्लेईङ सेटमा पार्लान ?

काठमाडौं । युएईमा जारी टी-१० क्रिकेट लिगमा नेपाली राष्ट्रिय क्रिकेट टिमका लेग स्पिनर सन्दीप लामिछाने रहेको टिम कर्नाटका टुसकेर्सले आज (शनिबार) पहिलो खेल खेल्दै छ ।

युनाइटेड अरब इमिरेट्स (युएई) को आबु धाबीमा सन्दीपको टिम टुसकेर्सले दिल्ली बुल्ससँग प्रतिस्पर्धा गर्नेछ । खेल नेपाली समय अनुसार राति ७:३० मा सुरु हुनेछ ।

बुल्सविरुद्ध मैदान उत्रदा टुसकेर्स सुखद सुरुवात गर्ने लक्ष्यमा हुनेछ । यस्तै बुल्स पनि पहिलो जितको खोजीमा हुनेछ ।

सिजनको पहिलो खेलमा टुसकेर्सले सन्दीपलाई प्लेईङ सेटमा खेलाउने सम्भावना बलियो रहेको छ । किनकी सन्दीपले अघिल्ला सिजन टी-१० लिगमा उत्कृष्ट प्रदर्शन गरेका थिए ।

यस अघि शुक्रबार नेपाली राष्ट्रिय टिममा निवर्तमान कप्तान पारस खड्का रहेको टिम आबु धाबीले क्वालान्डर्ससँग अंक बाडेका थिए । दुई टिमबीचको खेल 'टाई' भएपछि दुवै टिमले एक एक अंक बाडेका हुन् ।