टी-१० लिगमा पारसको डेब्यु होला ?

काठमाडौं । नेपाली राष्ट्रिय क्रिकेट टिमका निवर्तमान कप्तान पारस खड्का रहेको टिम आबु धाबीले टी-१० क्रिकेट लिगको पहिलो खेलमा आज (शुक्रबार) क्वालान्डर्ससँग प्रतिस्पर्धा गर्दैछ ।

युनाइटेड अरब इमिरेट्स (युएई) को दुबईमा हुने आबु धाबी र क्वालान्डर्सबीचको खेल नेपाली समय अनुसार राति १०:४५ बजे सुरु हुनेछ ।

दुवै टिम पहिलो खेलमा जित निकाल्दै सुखद सुरुवात गर्ने लक्ष्यमा हुनेछ । पारसको टिम आबु धाबी मोइन अलीको कप्तानीमा मैदान उत्रने छ ।

क्वालान्डर्सविरुद्धको खेलमा प्लेईङ सेटमा पर्दै पारसले टी-१० मा डेब्यु गर्ने सम्भावना रहेको छ ।

टी-१० लिग पारसको पहिलो विदेशी फ्रेन्चाइज लिग हो । यस्तै पारस विदेशी फ्रेन्चाइज लिग खेल्ने तेस्रो नेपाली खेलाडी हुन् । यसअघि नेपालका सन्दीप लामिछाने र सोमपाल कामीले मात्र विदेशी फ्रेन्चाइज लिग खेलेका छन् ।

टी-१० लिगको यस सिजन नेपालका अर्का खेलाडी सन्दीप लामिछानेले पनि खेल्ने छन् । लेग स्पिनर सन्दीपले यस सिजन कर्नाटका टुसकेर्सबाट खेल्ने छन् ।