काठमाडौं । अन्तर्राष्ट्रिय मैत्रीपूर्ण खेलका लागि म्यानमार जाने नेपाली राष्ट्रिय फुटबल टिमको विदाई गरिएको छ ।
अखिल नेपाल फुटबल संघ (एन्फा) ले आइतबार म्यानमार जाने टिमको विदाई गरेको हो । नेपाली टोलीलाई एन्फाका अध्यक्ष कर्मा छिरिङ शेर्पाले विदाई गरे ।
खेलाडीको विदाई गर्दै अध्यक्ष शेर्पाले म्यानमारविरुद्ध यू-२३ र महिला टिमले उच्च प्रदर्शन गरेको कारण सिनियर टिमले पनि उच्च प्रदर्शन गर्ने विश्वास लिएको बताए ।
२३ खेलाडीसहितको नेपाली टिम आइतबार नै दिउँसो म्यानमार प्रस्थान गर्ने छन् ।
नेपालले म्यानमारसँग कात्तिक २१ गते उसैको मैदानमा मैत्रीपूर्ण खेल खेल्नेछ ।
कतारमा आयोजना हुने फिफा विश्वकप छनोट अन्तर्गत समूह चरणको खेल खेलिरहेको नेपालले घरेलु मैदानमा हुने खेलअघि म्यानमारसँग मैत्रीपूर्ण खेल खेल्न लागेको हो ।
नेपालले पहिलो घरेलु खेलमा कुवेतसँग मंसिर ३ गते दशरथ रंगशालामा खेल्नेछ । म्यानमारसँगको मैत्रीपूर्ण खेललाई कुवेतसँगको तयारीको रुपमा हेरिएको छ ।
विश्वकप छनोटको समूह 'बी' मा रहेको नेपालले ४ खेलमा ३ अंक जोडेको छ । नेपाल समूहको चौंथो स्थानमा छ ।
नेपाली टिममा भरत खवासले पुनरागमन गरेका छन् । भरत पछिल्लो पटक गत मार्चमा कुवेतविरुद्धको मैत्रीपूर्ण खेल खेलेका थिए ।
भरतसँगै गोलकिपर एलेन न्यौपानेले टिममा पुनरागमन गरेका छन् । यस्तै मिडफिल्डर सुवास गुरुङ र मिक्चेन तामाङले पहिलोपटक टिममा स्थान बनाएका छन् ।
यस पटक कप्तान तथा गोलकिपर किरण चेम्जोङ, मिडफिल्डर रोहित चन्द, विशाल राई र हेमन गुरुङ टिममा छैनन् ।
किरण भारतीय आईलिग टिम मिनेर्वा पन्जाबको टिमसँग रहेका छन् । यस्तै रोहित पर्सिजा जकार्ताबाट इन्डोनेसियाको लिगमा व्यस्त छन् ।
नेपाली टिम :
गोलकिपर : विकेश कुथु, विशाल श्रेष्ठ, एलेन न्यौपाने
डिफेन्डर : सरोज दाहाल, अजित भण्डारी, दिनेश राजवंशी, अनन्त तामाङ, देवेन्द्र तामाङ, रजिन धिमाल, सुमन अर्याल
मिडफिल्डर : सुनिल बाल, रवी पासवान, अन्जन बिष्ट, सुजल श्रेष्ठ, बिक्रम लामा, तेज तामाङ, सन्तोष तामाङ, सुवास गुरुङ, मिक्चेन तामाङ
फरवार्ड : भरत खवास, विमल घर्ति मगर, अविशेक रिजाल, नवयुग श्रेष्ठ
