एजेन्सी । प्रिमियर लिग फुटबलमा म्यान्चेष्टर सिटीले पुनरामगन जित आत्मसाथ गरेको छ ।
शनिबार राति घरेलु मैदान ईतिहाद स्टेडियममा सिटीले साउथह्याम्टनलाई २–१ गोल अन्तरले हराएको हो ।
खेलमा अग्रता पाहुना टोली साउथह्याम्टनले १३ औ मिनेटमा जेम्स वार्डको गोलबाट लिएको थियो ।
पछिल्लो खेलमा लेस्टर सिटीसंग ९–० को पिडादायी हारलाई बिर्साउदै साउथह्याम्टनले बलियो टोली सिटीविरुद्व अग्रता लिएको थियो ।
सर्जियो अग्युरोले ७० औ मिनेटमा बराबरी गोल गरेका थिए । वाल्कर क्रसलाई सदुपयोग गर्दै अग्युरोले गोल गरेका हुन् ।
खेल सकिन चार मिनेट बाँकी छदाँ वाल्करले गोल गर्दै सिटीलाई घरेलु मैदानमा उत्कृष्ट पुनरागमन जित दिलाए ।
जितपछि सिटीले शीर्ष स्थानको लिभरपुलमाथि दबाब कायमै राखेको छ । सिटीको ११ खेलबाट २५ अंक छ । साउथह्याम्टन ८ अंक सहित रेलिगेशन जोनमा छ ।
