काठमाडौं । नारायणी मिल्कका अभिषेक बोस र स्टार इनभेष्टमेन्टमा दिनेश राई अन्नपूर्ण पोस्ट् कर्पोरेट ब्याडमिन्टन प्रतियोगिता अन्तर्गत कर्पोरेट सिंगल स्पर्धाको फाइनलमा प्रवेश गरेका छन् ।
राष्ट्रिय खेलकुद परिषद् (राखेप) कभर्ड हल कोर्टमा मंगलबार भएको सेमिफाइनल खेलमा अभिषेकले बी एन्ड बी का बालमुकुन्द ढुङ्गानालाई २१–१७, २१–१२ को सेटमा हराए ।
अर्को सेमिफाइनलमा दिनेशले टियुका खेमराज भट्टलाई २१–१८, २१–१४ को सेटमा पाखा लगाए । यसअघि मंगलबारनै भएको क्वार्टरफाइनल खेलमा अभिषेकले अमुदी फुड्सका अच्युत बस्नेतलाई २१–११, २१–१३ को सोझो सेटमा हराएका थिए ।
यस्तै दिनेशले एलडी ग्रुपका हेमन्त अग्रवाललाई २१–१५, २१–१८ को सोझो पराजित गरेका थिए ।
ज्योती विकास बैंकका विकाश मर्हजन र कामना सेवाका विशाल खड्का अन्नपूर्ण पोस्ट् कर्पोरेट ब्याडमिन्टन प्रतियोगिताको एक्जुकेटिभ सिंगलतर्फ फाइनलमा प्रवेश गरेका छन् । राखेप कभर्डहलमा मंगलबार भएको खेलमा विकाशले जेष्टका रामकुमार बानियालाई १५–२१, २१–१९, २१–१२ को सेटमा हराए ।
अर्को सेमिफाइनल खेलमा विशालले जेष्टकै सुजन थापालाई १३–२१, २१–१२, २१–८ ले पराजित गरे । यसअघि भएको सोही विधाको क्वार्टरफाइनलमा विकाशले जेष्ट ग्रुपमा अखिल श्रेष्ठलाई २१–१५, २१–१३ को सेटमा पाखा लगाएका थिए । विशालले बज्र अटोका रुपेल बादेलाई २१–१५, २१–६ को सेटमा पराजित गरेका थिए ।
त्यस्तै राष्ट्रिय खेलकुद परिषद्का उपाध्यक्ष पिताम्बर तिम्सिना र पोखरा एचएमका जयराम हमाल कर्पोरेट डबल्स स्पर्धाको फाइनलमा प्रवेश गरेका छन् ।
मंगलबार भएको सेमिफाइनल खेलमा पिताम्बर र जयरामको जोडीले मुक्रिनाथ विकास बैंकका प्रेम थापा र बेस्ट फाइनान्सका तोयाराज अधिकारीको जोडीलाई २१–६, २१–१४ को सोझो सेटमा पाखा लगाए ।
सोही स्पर्धामा युनिभर्सल इलेक्ट्रोका हरिओम गुप्ता र बुटवल पावरका खगेन्द्र रेग्मीले पनि फाइनलमा स्थान बनाएका छन् । सेमिफाइनलमा उक्त जोडीले त्रीभ ब्रोकरेजका अनुजराज पौडेल र प्रशान्त ताम्राकारको जोडीलाई २१–१७, २१–१४ को सेटमा हराउन सफल भयो ।
जेष्ट ग्रुपका सुजन थापा र रामकुमार वानियाको जोडी अन्नपूर्ण पोस्ट कर्पोरेट ब्याडमिन्टन अन्तर्गत एक्जुकेटिभ डबल्स स्पर्धाको फाइनलमा प्रवेश गरेका छन् ।
राखेप कभर्डहलमा मंगलबार भएको सेमिफाइनल खेलमा उक्त जोडीले नारायणी मिल्कका अभिषेश बोस र नियागरा फल्सका शुसिल श्रेष्ठको जोडीलाई २१–१३, १८–२१, २१–१७ को सेटमा स्तब्ध बनायो ।
यसैगरी सोही स्पर्धामा कामना सेवाका विशाल खड्का र बएएनएम सप्लायर्सका विश्वाश नेपालको जोडीले पनि फाइनलमा स्थान बनाएको छ ।
-1750132667.webp)
