निराजन र रुकेश दोस्रो चरणमा

काठमाडौं । विभागीय टोली एपिएफका निराजन देवकोटा र त्रिभुवन आर्मी क्लबका रुकेश महर्जन राजधानीमा सोमबारबाट सुरु भएको अन्नपूर्ण पोष्ट अन्तर्राष्ट्रिय कर्पाेरेट ब्याडमिन्टन प्रतियोगिताअन्तर्गत पुरुष एकलतर्फ दोस्रो चरणमा प्रवेश गरेका छन् ।

निराजनले अर्काे विभागीय टोली नेपाल पुलिस क्लबका पूर्ण बहादुर पाथालाई पराजित गर्दै प्रतियोगितामा सुखद् सुरुवात गरेका हुन् । दिनको पहिलो प्रतिस्पर्धात्मक खेलम निराजनले पूर्णलाई २१–१०, १७–२१, २१–१७ ले पराजित गरे ।

यस्तै रुकेशले बंगलादेशका मइनुल पर्भेजमाथी २१–१३, २१–१४ को सेटमा सहज जित निकाल्दै प्रतियोगिताको दोस्रो चरणको यात्रा तय गरेका हुन् । यस्तै पुरुष एकलतर्फकै अन्य खेलमा बिदेशी खेलाडीविरुद्ध जित हात पार्दै नेपालका बैकुण्ठ श्रेष्ठ र अखिल श्रेष्ठले पनि प्रतियोगिताको दोस्रो चरणमा स्थान सुरक्षित गरेका छन् ।

बैकुण्ठले बंगलादेशका प्रभाल हसन तालुक्दारलाई २१–१६, १३–२१, २१–१० को प्रतिस्पर्धात्मक सेटमा पराजित गरे । एपास इन्टरनेसनलका अखिलले भने भारतका ऐहसान कबीर अलीविरुद्ध २१–१८, २१–१७ को सेटमा सहज जित निकाले ।

पुरुष एकलतर्फ भारतका राजदीप शर्माले पनि विजयी सुरुवात गरेका छन् । उनले क्षेत्र नम्बर चारका विवेक विसीविरुद्ध २३–२१, २१–१४ को सेटमा जित निकाले ।

प्रतियोगिताको महिला एकलतर्फ प्रदेश नम्बर चारकी प्रजिता गुरुङ र प्रदेश नम्बर ६ की पुष्पा साही बिपक्षी खेलाडीबाट वाल्क ओभर पाउदै दोस्रो चरणमा पुगेका छन् । प्रजिताले प्रदेश नम्बर सातकी बिमला ओझा तथा पुष्पाले प्रदेश नम्बर सातकी मियोन तामाङबाट वाल्क ओभर पाएका हुन् ।

महिला एकलतर्फ प्रदेश नम्बर पाँचकी समिक्षा न्यौपाने र सुष्मा श्रेष्ठ तथा पाकिस्तानकी सम्जाद महुर भने आआफ्नो खेलमा जित हात पार्दै प्रतियोगिताको दोस्रो चरणमा प्रवेश गरेका छन् । समिक्षाले प्रदेश नम्बर दुईकी स्मृती राईलाई २१–६, २१–७, सुष्माले प्रदेश नम्बर दुईको चित्र हरीत्वालालाई २१–११, २१–९ तथा सम्जादले प्रदेश नम्बर ६ की सेस्ना श्रीपालीमाथी २१–५, २१–२ को सेटमा जित हात पारेका हुन् ।

समिक्षाले यू–१९ महिला एकलतर्फ पनि विजयी सुरुवात गरेकी छिन् । समिक्षाले महिला एकलतर्फ बाई पाएकी प्रदेश नम्बर चारकी प्रजिता गुरुङलाई २१–१३, २१–१० ले पराजित गरीन् । यस्तै यू–१९ महिला एकलतर्फ प्रदेश नम्बर चारकी आक्रिती केसी, प्रदेश नम्बर ६ की अग्रिमा भन्डारी र एसबीआई बैंककी सम्भावी पलकले पनि आफ्नो पहिलो खेलमा जित हात पारेकी छिन् ।

आक्रितीले प्रदेश नम्बर पाँचकी सुष्मा श्रेष्ठलाई २१–१८, २१–१४, अग्रिमाले प्रदेश नम्बर ६ की बिश्ना बिष्टलाई २१–१६, २१–१२ तथा सम्भावीले जेष्ठका प्रिती सिंह राजबंशीलाई २१–१४, २१–१६ ले पराजित गरेका हुन् ।

यस्तै यू–१९ को पुरुष एकलतर्फ बिनायक लाल श्रेष्ठ र सविन तामाङले दोस्रो चरणमा स्थान सुरक्षित गरेका छन् । बिनायकले विपक्षी खेलाडी एसबीआई बैंकका सम्भारी पलकबाट वाल्क ओभर पाएका हुन् भने सबिनले हेमाङ हाङ लिम्बूलाई २१–९, २१–३ ले पराजित गर्दै प्रतियोगितामा बिजयी सुरुवात गरेका हुन् ।