इटहरी । नेपाली सेनाका रत्नजित तामाङले लगातार आठौं पटक योनेक्स सनराईज नवौं पुष्पलाल स्मृती र्याकिङ राष्ट्रिय ब्याडमिन्टन प्रतियोगिताको उपाधि जितेका छन् ।
शनिबार भएको फाइनलमा एपिएफका दिपेश धामीमाथि २१-१९ र २१-१३ को सोझो जितमा जित निकाल्दै रत्न आठौं पटक च्याम्पियन बनेका हुन्। प्रतियोगितामा भोजपुरका बिकास श्रेष्ठ र सेनाका नविन श्रेष्ठ संयुक्त तेश्रो भए ।
यस्तै राष्ट्रिय च्याम्पियन रशिला महर्जनले पूर्व विजेता भोजपुरकी नङशल देवी तामाङलाई पराजित गर्दै महिलातर्फको उपाधि जितिन । पहिलो पटक यस प्रतियोगिताको उपाधि जित्ने क्रममा महर्जनले तामाङमाथि २१-१६ र २१-१५ को सेटमा जित निकालिन । एपिएफकी जेशिका गुरुङ र राजधानी युथ क्लबका सिमा राजबंशी तेस्रो भए ।
महिला र पुरुषको विजयी शीर्ष तीनले ५० हजार, २५ हजार र १२ हजार ५ सय प्राप्त गरे ।
नेपाल खेलकुद महासंघ, राष्ट्रिय ब्याडमिन्टन संघको आयोजनामा भएको प्रतियोगिताको पुरुष खुल्ला एकलतर्फ सेनाका पविन लिनथेपले कैलालीका देवराज रानालाई १९-२१, २१ -११, २१ - ११ ले पराजित गरे । तेश्रो स्थानमा एपिएफका प्रियान्सु सिंह क्षेत्री र निराजन देवकोटा रहे ।
यसैगरि महिला एकल खुल्लातर्फ कैलालीकी प्रार्थना देउवाले उपाधी चुमिन् । उनले जेष्ट ब्याडमिन्टनकी मनिषा खड्का सुरुवातमा नै खेलका दौरान खुट्टामा चोट आएका कारण खेल परित्याग गरेपछि उपाधी जितेकी हुन् । तेश्रो स्थानमा बाँकेकी सुष्मा श्रेष्ठ र जेष्टकी सफी खत्री रहे ।
ईटहरी रङ्गशालास्थित कभर्डहलमा भएको प्रतियोगिताको पुरुष युगलमा सेनाका रत्नजित तामाङ र नविन श्रेष्ठको जोडीले बाजी मार्यो । रत्न र नविनको जोडीले एपिएफका दिपेश धामी र विजित थापामगरको जोडीलाई १६ - २१, २१ - १७, २१ - १२ ले पन्छाउँदै उपाधि जिते । बाँकेका रियाज अन्सारी र ईरफान अन्सारी तथा सेनाका रुकेश महर्जन र प्रफुल महर्जनको जोडी तेश्रो भयो ।
यसैगरि महिला युगलतर्फ एपिएफका पुजा श्रेष्ठ र जेशिका गुरुङले बाजी मारे । पुजा र जेशिकाको जोडीले सेनाका रशिला महर्जन र रञ्जना भट्टको जोडीलाई २१ - १२, २१ - १३ ले पन्छाउँदै ट्रफी उचाले । तेश्रो स्थानमा सेनाका अमिता गिरी र अनुमाया राईको जोडी तथा बाँके र राजधानी युथ क्लब, मोरङका संझना शर्मा र सिमा राजबंशी रहे ।
महिला र पुरुष खुल्ला एकल तथा जोडीका शीर्ष तीन स्थानका खेलाडीले नगद २० हजार, १० हजार र ५ हजार प्राप्त गरे ।
छात्र यू-१७ तर्फ एपिएफका प्रियान्सु सिंह क्षेत्रीले बाजी मारे । उनले कैलालीका अमृत चौधरीलाई २१ - १२, १८ - २१, २१ - १२ ले पराजित गर्दै उपाधि हात पारे । तेश्रो स्थानमा कञ्चनपुरका हिमाल चन्द र सेनाका भोजबहादुर गुरुङ रहे । यस्तै छात्रातर्फ सेनाकी रशिलाले उपाधी चुमिन् । उनले राजधानी युथ क्लब, मोरङ्गकी सिमा राजबंशीलाई २१ - ५, २१ - ३ ले पराजित गरिन् । तेश्रो स्थानमा राजधानी युथकी रोज पाण्डे र सेनाकी रञ्जना भट्ट रहे ।
यस स्पर्धाको शीर्ष तीनले १० हजार, ७ हजार र ४ हजार प्राप्त गरे ।
भेट्रान्स युगलतर्फ पाल्पाका विरेन्द्र सिंह बिष्ट र महेश बज्राचार्यले जित निकाले । विरेन्द्र र महेशको जोडीले धनकुटाका किरण प्रधान र योगश्वर श्रेष्ठको जोडीलाई १८ - २१, २१ -१९, २१ - ११ ले पराजित गरे । ईलामका दर्शन भक्तराज र संजय भक्तराज तथा सेनाका सुभाष श्रेष्ठ र रुद्र थिङ्गको जोडीले तेश्रो स्थान हात पारे ।
विजयी खेलाडीहरुलाई प्रमुख अतिथी राष्ट्रिय खेलकुद परिषद्का सदस्य सचिव रमेश कुमार सिलवाल लगायतले पुरस्कार वितरण गरेका थिए ।
-1755526339.jpg)
