रुस विश्वकप आजबाट : ३२ टिम, ६४ खेल, १२ रंगशाला र ११ शहर

काठमाडौं । बहुप्रतिक्षित प्रतियोगिता २१ औं संस्करणको फिफा विश्वकप फुटबल आजबाट (बिहिबार) बाट रुसमा सुरु हुँदैछ ।

रुसको मस्कोस्थित लजनिकी रंगशालामा एक भव्य समारोहकाबीच फिफा विश्वकपको औपचारिक उद्घाटन हुँदैछ । विश्वकपको उद्घाटनमा शत्रमा रुसका राष्ट्रपति भ्लादमिर पुटिनसहित विश्व चर्चित नेता, कलाकार तथा खेलाडीहरुको उपस्थिति रहने छ ।

प्रतियोगिताको उद्घाटन खेलमा आयोजक रुसले एसियाली राष्ट्र साउदी अरेबियाको सामना गर्नेछ । रुस र साउदीबिचको खेल नेपाली समयअनुसार राति ८ : ४५ बजे सुरु हुनेछ । समूह ए मा रहेको दुवै टोलि उद्घाटन खेल जित्दै प्रतियोगितामा बलियो उपस्थिति बनाउन चाहन्छ । पहिलो दिन उद्घाटन खेल मात्र हुनेछ  । समूह चरणको अन्य खेल असार १ गतेबाट हुनेछ  ।

यो पटकको विश्वकपमा फिफाको ६ महादेशबाट छनोट खेलेका २०९ राष्ट्रबाट ३२ टोलीले सहभागिता जनाउदै छन् । फिफाले ३२ राष्ट्रलाई ८ समूहमा विभाजन गरेको छ । रुसको ११ सहरमा हुने यो पटकको विश्वकप विभिन्न १२ रंगशालामा हुनेछ । जसमा ६४ खेल हुनेछ ।  

रुस विश्वकपमा युरोपबाट १४ राष्ट्र छनोट हुँदा एसिया र अफ्रिकाबाट समान ५–५ देश छनोट भएका छन्  ।  त्यस्तै दक्षिण अमेरिकाबाट पनि ५ टोलीले विश्वकपमा स्थान बनाउँदा उत्तर अमेरिकाबाट ३ टोलीले विश्वकपमा स्थान बनाए ।

योपटक ओसियाना क्षेत्रबाट कुनै पनि टोलीले विश्वकपमा स्थान बनाउन सकेनन् । ओसियाना क्षेत्रबाट न्युजिल्यान्ड प्ले-अफमा पुगेपनि विश्वकपमा स्थान बनाउन सकेनन् ।

रुस विश्वकपमा यसपटक पाँच पटकको विजेता ब्राजिल, साबिकको बिजेता जर्मनी लगायतका  ठुला राष्ट्रहरु छनोट भए । तर, चार पटकको विजेता इटाली विश्वकपमा देखिने छैन । त्यस्तै युरोपबाट नेदरल्याण्ड, वेल्स जस्ता राष्ट्र समेत विश्वकपमा छनोट हुन् सकेनन् ।

युरोप बाहिरबाट अमेरिका, चिली, आइभरी कोष्ट, घाना जस्ता ठुला राष्ट्रहरुले विश्वकप खेल्ने छैनन् । यस्तै आइसल्याण्ड र पनामा पहिलो पटक विश्वकपमा छनोट भएका छन् ।

विश्वकपमा छनोट भएका राष्ट्रः

युरोपः रुस, जर्मनी, इंगल्याण्ड, पोर्चुगल, फ्रान्स, स्पेन, बेल्जियम, पोल्याण्ड, आइसल्याण्ड, सर्विया, स्वीट्जरल्याण्ड, क्रोएसिया, डेनमार्क, स्वीडेन

एसियाः जापान, दक्षिण कोरिया, साउदी अरेबिया, इरान, अष्ट्रेलिया

दक्षिण अमेरिकाः ब्राजिल, अर्जेन्टिना, उरुग्वे, कोलम्बिया, पेरु

अफ्रिकाः इजिप्ट, नाइजेरिया, सेनेगल, मोरोक्को, ट्युनिसिया

उत्तर अमेरिकाः मेक्सिको, कोस्टारिका, पनामा