बागेश्वरी र आदर्श च्याम्पियन

धादिङ । बागेश्वरी माध्यमिक विद्यालय र आदर्श माध्यमिक विद्यालयले एन्फा कप अन्तर छात्र तथा छात्रा विद्यालय फुटबल प्रतियोगिताको उपाधि जितेका छन् । धादिङ जिल्ला फुटबल संघको समन्वयमा भएको प्रतियोगितामा बागेश्वरी छात्र र आदर्श छात्रातर्फ च्याम्पियन बनेको हो ।  

गजुरी गाउँपालिकाको गलैदीमा भएको छात्रको फाइलनमा रिचोकटारको बागेश्वरीले आदर्श माध्यमिक विद्यालय वैरेनीलाई २–० गोल अन्तरले पराजित गर्दै उपाधि हात पार्यो । छात्रातर्फको फाइनलमा आदर्शले  वैरेनीको बागेश्वरी माध्यमिक विद्यालयलाई समान २–० को गोल अन्तरले पराजित गर्यो ।

असार १६ गतेबाट सञ्चालन भएको प्रतियोगितामा छात्रतर्फ १७ र छात्रातर्फ ८ विद्यालयको सहभागिता रहेको धादिङ जिल्ला फुटबल संघका महासचिव रामहरी थापाले जानकारी दिए । विजेतालाई धादिङ जिल्लाका सभासद भूमि त्रिपाठी, जिल्ला फुटबल संघका अध्यक्ष रमेश अधिकारी लगायतले पुरस्कृत गरेका थिए ।