विश्व फुटबललाई चकित पार्न फेरी तयार 'आइसल्याण्ड'

एजेन्सी । बेलायती पत्रिका द गार्जियनले विश्वभर रहेका आफ्ना पाठकहरु माझ गरेको सर्वेक्षणमा आफ्नो देश बाहेक विश्वकपमा कसलाई समर्थन गर्छौ भनेर सोध्दा अधिकांशको उत्तर थियो 'आइसल्याण्ड ' । 

हो, आइसल्याण्डले अहिले विश्वबाट सहानुभूति बटुलिरहेको छ । किन त ?  क्षेत्रफल र जनसंख्या दुवै आधारमा विश्वकै सबैभन्दा साना मध्येको एक राष्ट्र हो आइल्याण्ड । तर, फुटबलमा निक्कै नै अब्बल, ठुला भनिएका राष्ट्रलाई माथ खुवाउने खुबि छ ।

आइल्याण्ड, जम्मा जम्मी तीन लाख जनसंख्या, अत्यन्तै चिसो भूगोल, फुटबल मैदानमा घास उमार्न कठिन ।  तर, फिफा बरियतालाई आधार मान्ने हो भने कित्रिम मैदान र इन्डोर अभ्यास हलको प्रयोग गरेरै आइसल्याण्ड विश्वकै २५ बलिया टिम मध्येका एक हो ।  

यो पटकको विश्वकपमा सहभागी देशमध्ये सबै भन्दा कम जनसंख्या भएको आइसल्याण्ड नै हो ।  तर, उसको लक्ष्य जनसंख्या र क्षेत्रफल जस्तो सानो छैन् । 

सन् २०१६ को युरो कपमा अन्तिम आठ सम्मको यात्रा गरेको आइसल्याण्ड रसियामा पनि त्यस्तै चमत्कार गर्ने लक्ष्यमा छ ।   फ्रान्स युरोमा तहल्का मच्चाउदा आइसल्याण्डको टिममा दुई प्रशिक्षक थिए,  लार्स लागेरब्याक र हेइमिर हलग्रिम्सन ।  तर, युरो लगत्तै लागेरब्याक नर्वेको राष्ट्रिय टोली सम्हाल्न गएपछि हलग्रिम्सन एक्लैले आइसल्याण्ड टिम हेरिरहेका छन् ।

विश्वकपका लागि खेलाडी छनौट गरिसकेपछि प्रशिक्षक हलग्रिम्सनले विश्वकपमा  समूह चरण पार गर्नु नै आइसल्याण्डको लक्ष्य रहेको बताएका थिए ।  तर, उनको टिमलाई लक्ष्य प्राप्ति त्यति सहज भने छैन  । 

समूह 'डि' मा रहेको आइसल्याण्डले लियोनल मेस्सीको अर्जेन्टिना, क्रोएसिया र नाइजेरिया जस्ता बलियो टोलीको सामना गर्नेछ ।  त्यसो त विश्वकप छनौट चरण मै आइसल्याण्डले युरोपेली प्रतिद्वन्दी क्रोएसियाको सामना गरेको थियो, छनौटमा आइसल्याण्डले एक जित र एक हारको नतिजा निकालेको थियो  ।  छनौट चरणमा आइसल्याण्ड रहेको समूह त्यति सजिलो भने थिएन ।  तर,  क्रोएसिया, टर्की र युक्रेन रहेको समूहमा आइसल्याण्ड पहिलो स्थानमा रहदै रसिया यात्रा तय गर्न सफल भएको थियो ।  

हलग्रिम्सन आइसल्याण्डको एकल प्रशिक्षक भएपछी खेल्ने शैलीमा केहि परिवर्तन गरेका छन् ।  पहिले  ४-४-२ को रणनितिमा खेल्ने आइसल्याण्डले अहिले ४-५-१ को प्रयोग गर्छन् ।

आइसल्याण्डको सबै भन्दा सबल पक्ष भनेको डिफेन्स हो ।  बलिया प्रतिद्वन्दीबिरुद्द खेल्दा सधै पाँच डिफेन्डरका साथ् खेल्ने आइसल्याण्डले रुसमा पनि त्यहि रणनीति अबलम्बन गर्न सक्छ ।  काउन्टर अट्याक र आपासी तालेमल आइसल्याण्डको बलियो हतियार हुन् ।

लामो पास तथा सेट पिसमा आइसल्याण्डका खेलाडीहरु माहिर छन् । बिशेषगरी गिल्फी सिगर्ड्सन र जोहान बर्ग गौमोण्ड्सन।  तर,  चोटका कारण एभर्टनका सिगर्ड्सन विश्वकपको कति दिन अगाडी तयार हुन्छन भन्ने एकिन छैन ।  आइसल्याण्डका लागि मिडफिल्डमा सिगर्ड्सन र  गौमोण्ड्सनको तालमेलले ठुलो अर्थ राख्नेछ।  त्यस्तै कप्तान आरोन गुनरर्सन टोलीको अर्का महत्वपुर्ण सदस्य हुन् जसले डिफेन्सलाई मिडफिल्डबाट मद्धत गर्छन । 

हान्नेस थोर हाल्दर्सन आइसल्याण्डका लागि पछिल्ला छ बर्ष देखि गोलपोस्ट सम्हाल्दै आएका खेलाडी हुन् । उनका अगाडी दुइ मिल्ने साथि कारी अर्नासन र राग्नर सिगुर्ड्सन सेन्ट्रल डिफेन्समा रहनेछन् ।  यी दुइ भेट्रान खेलाडीको तालमेल र प्रदर्शनको खुब तारिफ भएको थियो  फ्रान्स युरोमा ।

इन्ग्लिश क्लब रिडिङ्गबाट खेल्ने जोन डाडि बुभरसन, जर्मन क्लब असबर्गका अल्फ्रेड फिन्बोगासोनं र बेरग्मान सिगोर्डासोन ली आइसल्याण्डको अग्रपंगती सम्हाल्ने छन्। 

विश्व फुटबल को मानचित्र मा बिस्तारै आफ्नो छाप  छोढ्दै गैरहेको आइसल्याण्डले यो विश्वकपमा कुन स्तरको प्रदर्शन गर्छ हेर्न बाकि नै छ ।  तर, विश्वकपमा उपाधि दाबेदार मानिएका बलिया देश बाहेक अन्य कसैको प्रदर्शनको व्यग्य प्रतिक्षा छ भने त्यो आइसल्याण्ड कै हो ।