पाभार्डको गोल रुस विश्वकप कै 'उत्कृष्ट गोल'

एजेन्सी । विश्वकप विजेता फ्रान्सका डिफेन्डर बेन्जामिन पाभार्डको गोल रुस विश्वकप फुटबल कै उत्कृष्ट गोल चुनिएको छ । विश्व फुटबलको सर्वोच्च निकाय फिफाले पाभार्डको गोल रुस विश्वकपकै उत्कृष्ट गोल बनेको जनाएको छ ।

कोलम्बियाका जुवान क्विनटेरो र क्रोएसियाका लुका मोड्रिचको गोललाई पछि पार्दै पाभार्डको गोल उत्कृष्ट चुनिएको हो । फिफाको मनोनयनमा परेको उत्कृष्ट गोलमध्ये अनलाइन भोटिङको आधारमा पाभार्डको उत्कृष्ट ठहरिएको हो ।

रुसमा सम्पन्न विश्वकपको ६४ खेलमा कुल १६९ गोल भएको थियो । फिफाले उत्कृष्ट गोलको लागि १२ गोललाई अनलाइन भोटिङको लागि राखेको थियो । जसमा पाभार्डको गोलले बाजी मारेको हो ।

विश्वकप अन्तर्गत अर्जेन्टिनाविरुद्धको प्रि क्वाटरफाइनल खेलमा पाभार्डले हाफ भली गोल गरेका थिए । डिबक्स बाहिरबाट उनले प्रहार गरेको लामो सुट निकै सुन्दर तरिकाले गोलमा परिणत भएको थियो । उक्त खेलमा फ्रान्सले अर्जेन्टिनालाई ४-३ ले हराएको थियो ।

रुस विश्वकपमा आफ्नो उत्कृष्ट गोल चुनिएपछि पाभार्डले स्ट्राइकरले सल्लाह दिएअनुसार प्रहार गर्दा  गोल भएको बताए । विश्वकप विजेता २२ बर्षे पाभार्डले फिफासंग भनेका छन्, 'बल उर्फदै म तर्फ आयो । मैले योबारे खासै केहि सोचिन् तर जुन दिशाबाट बल आइरहेको मैले त्यहि दिशामा हिर्काउन ट्राइ गरे । जुन मलाई सधै स्ट्राइकरले भन्ने गर्थे । त्यसपछि मैले केहि सोच्न सकिन । जब बलले दिशा लियो मलाई खुशी लाग्यो ।'

पाभार्ड सन् २००६ पछि विश्वकपमा उत्कृष्ट गोल गर्ने पहिलो युरोपियन खेलाडी समेत हुन् ।

भोटिङमा क्विनटेरोको गोल दोस्रो र मोड्रिचको गोल तेस्रो बनेको छ । क्विनटेरोले जापानविरुद्ध फ्रिकिकमा गोल गरेका थिए । यस्तै मोड्रिचले अर्जेन्टिनाविरुद्ध लामो दुरीबाट उत्कृष्ट गोल गरेका थिए ।

रुस विश्वकपको उत्कृष्ट गोलको सुचिमा स्पेनका नाचो, जर्मनीका टोनी क्रुस, पोर्चुगलका क्रिस्टियानो रोनाल्डो र अर्जेन्टिनाका एन्जल डी मारिया लगायतका खेलाडी गोल मनोनयनमा परेको थियो ।