एजेन्सी । अर्जेन्टिनी स्टार लियोनल मेस्सीले आफ्नो टिम समूह चरणको अन्तिम खेलमा कतारलाई पराजित गर्नमा आत्मविश्वासी रहेको बताएका छन् । कोपा अमेरिका फुटबलको समूह चरणको अन्तिम खेलमा अर्जेन्टिनाले एसियाली मुलुक कतारसंग प्रतिस्पर्धा गर्दैछ ।
समूह चरणको दोस्रो खेलमा पाराग्वेसंग १–१ गोलको बराबरी खेलेपछि अर्जेन्टिना कोपा अमेरिकाबाट बाहिरिने अवस्थामा पुगेको छ । एक खेलमात्र खेल्न बाँकी रहेको अवस्थामा अर्जेन्टिना समूह चरणको अन्तिममा छ ।
मेस्सीकै पेनाल्टी गोलमा बिहिबार बिहान भएको खेलमा अर्जेन्टिनाले बराबरी खेलेको थियो । खेलमा अग्रता पाराग्वेले ३७ औ मिनेटमा रिचर्ड सान्चेजको गोलमार्फत लिएको थियो । मिगुएल अल्मिरोनको उत्कृष्ट क्रसलाई सान्चेजले गोलको दिशा दिएका थिए ।
५७ औ मिनेटमा पेनाल्टी गोलमार्फत अर्जेन्टिना खेलमा फर्किएको थियो । डि बक्सभित्र इभान पेरिसको ह्यान्ड बलमा अर्जेन्टिनाले पेनाल्टीको अवसर पाएको थियो । जसमा लियोनल मेस्सीले गोल गरे ।
६३ औ मिनेटमा पाराग्वेले खेलमा पुन अग्रता लिने अवसर गुमायो । डर्लिस गोन्जालेजको पेनाल्टी प्रहारलाई अर्जेन्टिनी गोलकिपरले असफल पारे ।
कतारलाई पराजित गरेपनि अर्जेन्टिनाको अघिल्लो चरण प्रवेशको सम्भावना अन्य खेलमा निर्भर रहन्छ । शीर्ष स्थानको कोलम्बियाले पाराग्वेलाई पराजित गरेमात्र अर्जेन्टिना दोस्रो चरणमा पुग्ने छ । कोलम्बिया र पाराग्वेको बराबरी र पाराग्वेको जित भए अर्जेन्टिना बाहिरिने छ । तर मेस्सी आफ्नो टिमप्रति निकै आत्मविश्वासी देखिन्छन् ।
'म देखेको छु, टिम अर्को खेल जित्न पुरै आत्मविश्वासी छ ।' उनले भनेका छन् ।
'हामीले टिमको खोजी गर्न र सुधार गर्न आवश्यक छ ।' उनले थपेका छन् ।
अर्जेन्टिना पाराग्वेविरुद्व तीन अंक बटुल्न असफल रह्यो ।
'पहिला केही मिनेट हामीले बललाई सहि ठाउँमा राखेको थियौ । तर गोल भएपछि केही सन्तुलन गुमायौ । तर दोस्रो हाफमा हामीले सक्दो कोशिश गर्यौ र बराबरीको नतिजा निकाल्न सफल भयौ ।' उनले भने ।
अर्जेन्टिना तालिकाको पुछारमा छ । समूहको शीर्ष स्थानमा कोलम्बिया ६ सहित रहेको छ । पाराग्वे दुई अंक सहित दोस्रो र कतार एक अंक सहित तेस्रो स्थानमा छ ।
-1746755007.webp)
