काठमाडौं । प्रदेश नम्बर पाँचमा सम्पन्न आठौं राष्ट्रिय खेलकुद प्रतियोगितामा पदक विजेता सशस्त्र प्रहरीको एपीएफ क्लबका खेलाडीहरु नगदसहित सम्मानित भएका छन् ।
हल्चोकस्थित सशस्त्र प्रहरीको मुख्यालयमा बिहिबार एपीएफले पदक विजेता खेलाडीलाई नगदसहित सम्मानित गरेको हो ।
एपीएफलेस्वर्ण विजेतालाई जनही १० हजार, रजत विजेतालाई ७ हजार र कांस्य विजेतालाई ५ हजार नगदले सम्मान गरेको हो । यस्तै एक भन्दा बढी पदक ल्याउने खेलाडीलाई पुरस्कारको रकममा ५० प्रतिशत थप गरिएको एपीएफले जनाएको छ ।
आठौंमा एपीएफ क्लब तेस्रो भएको थियो । एपीएफले ५४ स्वर्ण, ६९ रजत र ८० कांस्यसहित कुल २०२ पदक पदक जितेको थियो ।
खेलाडीलाई सशस्त्र प्रहरीको प्रमुख महानिरीक्षक शैलेन्द्र खनालले सम्मानित गरेका थिए । कार्यक्रममा बोल्दै खनालले खेलाडीले सातौंमा भन्दा बढी पदक जितेकोमा खुशी व्यक्त गरे ।
'सातौंको भन्दा ४ स्वर्ण बढी ल्याउनु भएको छ । धेरै खुशी छु । खेलमा उपस्थिति जनाउन नपाए पनि यहाँबाट निरन्तर सहयोग गरिरहेको हुन्छु,' खनालले भने ।
-1746755007.webp)
