कोहली ५० औं शतकको दौडमा, सचिनको कीर्तिमान भङ्ग होला ?

एजेन्सी । भारतीय क्रिकेट टिमका पुर्व ब्याट्सम्यान सचिन तेन्दुलकरलाई क्रिकेटको भगवान मानिन्छ । किनकि विश्व क्रिकेटमा तेन्दुलकरले अनेक कीर्तिमानी आफ्नो नाममा बनाएको छ ।

तेन्दुलकरले बनाएको ब्याटिङको कीर्तिमानी तोड्न जो कोहिलाई कठिन हुने क्रिकेट विश्लेषकहरुले दाबी गर्दै आएका छन् । तर, भारतीय क्रिकेट टोलीका कप्तान विराट कोहली तेन्दुलकरको कीर्तिमानीहरु तोड्ने लयमा देखिएका छन् ।

पछिल्लो समय तेन्दुलकरको कीर्तिमान कसैले तोड्यो भने कोहलीले मात्र सक्ने बताउन थालिएको छ । कोहलीले एक पछि अर्को उत्कृष्ट इनिङ्स खेलिरहेका छन् ।

घरेलु भूमिमा अष्ट्रेलियविरुद्धको जारी एकदिवसीय क्रिकेट सिरिजमा समेत कोहलीले उत्कृष्ट प्रदर्शन गरिरहेका छन् । अष्ट्रेलियासंगको सिरिज अन्तर्गत चार खेल सकिदा कोहलीले एक शतक प्रहार गरिसकेका छन् ।

अष्ट्रेलियाविरुद्धको दोस्रो एकदिवसीयमा शतक बनाएसंगै कोहलीले करियरको ४१ औं एकदिवसीय शतक पुरा गरे । र, कोहली आफुलाई महान खेलाडी तेन्दुलकरको हैशियततर्फ अघि बढाउन सफल भए ।

एकदिवसीय क्रिकेटमा तेन्दुलकरले ४९ शतक बनाएर किर्तीमान बनाएका छन् । कोहलीले ४१ औं शतक बनाएका छन् ।  अब कोहलीलाई तेन्दुलकरको कीर्तिमानी भंग गर्न ९ शतकको खाचो छ । तर, कोहलीले तेन्दुलकरको उक्त कीर्तिमान सहज पुरा गर्ने अनुमान गरिएको छ ।

सन् २०१५ को विश्वकपपछि कोहलीले जति रन अन्य कुनै खेलाडीले बनाउन सकेको छैन् । उनले ६७ इनिङ्समा ४ हजार २ सय ७९ रन बनाएका छन् ।

भारतका अर्का खेलाडी रोहित शर्मा भने ६ सय रनले कोहली भन्दा पछि परेका छन् । यस्तै ६९ इनिङ्समा ३ हजार २ सय ८८ रन बनाउदै इंग्ल्याण्डका जोए रुट तेस्रो स्थानमा रहेका छन् । कोहलीको औसत (८०.७३) सबै खेलाडीको भन्दा उच्च रहेको छ ।  स्ट्राइक रेट ९८.३४ रहदा तेस्रो स्थानमा छन् ।

सन् २०१५ कोहली लागि खासै राम्रो रहेको थिएन । उक्त समय कोहलीले औसत र स्ट्राइक रेट डेब्यु पछिकै सबैभन्दा कम रहेको थियो ।

सन् २०१७ पछि भने कोहली १५ शतकसहित ३ हजार २ सय ४६ रन बनाईसकेका छन् । कोहलीले ४१ शतक प्रहार गर्न जम्मा २१७ इनिङ्स खेलेका छन् । कोहलीले बनाएको ५.२९ इनिङ्समा एक शतकको प्रदर्शन अन्य कुनै खेलाडीको छैन् ।

दोस्रो स्थानमा रहेका दक्षिण अफ्रिकाका हसिम अम्लाले १७१ इनिङ्समा २७ शतक बनाउँदा कम्तिमा ६.३३ इनिङ्समा एक शतक प्रहार गरेका छन् ।

कोहलीले ९० अर्धशतक बनाईसकेका छन् । उनले प्रहार गरेको अर्धशतक ४५.५६% शतकमा परिवर्तन गर्ने गरेका छन् । जुन कोहलीले छिटो शतक बनाउनुको एक कारण हो ।

एकबर्ष भित्र ५ वा सो भन्दा बढी शतक प्रहार गर्ने कोहली एक्लो खेलाडी हुन् । उनले सन् २०१७ र २०१८ मा ६ शतक र सन् २०१२ मा ५ शतक प्रहार गरेका थिए ।

कोहलीले बनाएको ४१ शतक मध्ये २५ शतक लक्ष्य पछ्याउँदा बनाएका हुन् । कोहलीले भारतलाई खेल जिताउन २१ शतक प्रहार गरेका छन् ।

समग्रमा हेर्दा कोहलीको ४१ शतकमा भारतले ३३ पटक जित हात पारेको छ भने ७ खेलमा हार र १ बराबरी गरेको छ ।

कोहलीविरुद्ध अम्ला  

५ हजार, ६ हजार, र ७ हजार रन सबैभन्दा छिटो पुरा गर्ने कोहलीको कीर्तिमान अमलाले सहजै तोडेका थिए । 

अब अम्लालाई ८ हजार रन पुरा गर्दै कोहलीको कीर्तिमानी तोड्न ३ इनिङ्समा ९० रनको आवश्यकता छ ।

कप्तानको रुपमा कोहली

कप्तानको रुपमा कोहलीको ब्याटिङ अझ उत्कृष्ट रहेको छ । ६६ एकदिवसीय खेलमा भारतको कप्तानी गरेका उनले ४ हजार ९६ रन जोडेका छन् ।

कप्तानको रुपमा १९ शतक प्रहार गरेका कोहली अष्ट्रेलियाका पुर्व कप्तान रिकी पोण्टिङको २३० खेलको २२ शतक भन्दा ३ शतकले पछि रहेका छन् ।