मोसेसको पेनाल्टी गोल, अर्जेन्टिनाविरुद्ध खेलमा फर्कियो नाइजेरिया

एजेन्सी । फिफा विश्वकप फुटबल अन्तर्गत समूह चरणको अन्तिम खेलमा अर्जेन्टिनाविरुद्ध नाइजेरिया खेलमा फर्किएको छ  । अर्जेन्टिनाले पहिलो हाफमा बनाएको अग्रता उल्टाएर नाइजेरियाले खेल १ -१  को बराबरीमा ल्याएको हो ।

सेन्ट पिटर्सवर्ग स्टेडियममा मैदानमा नाइजेरियाका भिक्टर मोसेसले खेलको ५१ औं मिनेटमा पेनाल्टीमा गोल गरे । अर्जेन्टिनाका मस्चिरानोले नाइजेरियाका खेलाडीलाई फल गरेपछि पाएको पेनाल्टीमा मोसेसले सहजै गोल गरेका हुन् ।

यसअघि अर्जेन्टिनाले कप्तान लियोनल मेस्सीको गोलबाट सुरुवाती अग्रता बनाएको थियो  । खेलको १४ औं मिनेटमा मेस्सीले गोल गर्दै अर्जेन्टिनालाई सुरुवाती अग्रता दिलाएका हुन् । जारी विश्वकपमा मेस्सीको यो पहिलो गोल हो ।

समूह डीमा रहेको नाइजेरिया र अर्जेन्टिना महत्वपूर्ण खेल खेल्न मैदान उत्रिएका हुन् ।  दुवै टोली आज गर या मरको स्थितिमा छ ।

समूह डी मा रहेका दुवै टोलीलाई नकआउट चरणमा पुग्न जित्नै पर्ने दबाब छ । बराबरी खेलेमा अर्जेन्टिनाको सम्भावना समाप्त हुनेछ भने नाइजेरियाको भाग्य अर्को खेलमा निर्भर हुनेछ । तर, अर्जेन्टिनासँग बराबरी खेलेमा नाइजेरियाको दोस्रो चरणको यात्रा निकै बलियो हुनेछ ।

यो समूहबाट क्रोएसिया नकाउट चरणमा पुगिसकेको छ । त्यसैले नाइजेरिया र अर्जेन्टिनाबीचको खेलले यो समूहबाट दोस्रो चरण पुग्ने अर्को टोलीको तय हुनेछ ।