धनगढी । धनगढीमा आयोजना हुने विद्यालय स्तरको फुलबल प्रतियोगिता लिटिल फ्लावर सुपर लिगको उद्घाटन खेलमा लिटिल फ्लावर बोर्डिङ स्कुल र क्रिस्टल एकेडेमी धनगढी भिड्ने छन् ।
आयोजक लिटल फ्लावर बोडिङ स्कुलले शुक्रबार निकालेको खेल तालिका अनुसार उद्घाटन खेलमा लिटल र क्रिस्टलबीच प्रतिस्पर्धा हुने भएको हो । प्रतियोगिताको उद्घाटन खेल फागुन १३ गते हुनेछ।
प्रतियोगितामा कैलाली जिल्लाका विभिन्न १२ सामुदायिक र निजी विद्यालयहरुको सहभागिता रहने छ । धनगढीस्थित क्षेत्रीय रंगशालामा हुने प्रतियोगितामा धनगढीको ऐश्वर्या बिद्या निकेतन, कैलाली बिद्या निकेतन, सैनिक आवासिय माबी अत्तरिया, सत्यवती माबी अत्तरिया, खप्तड बिद्या निकेतन अत्तरिया सहभागी हुने छन् ।
त्यस्तै स्टेपिङ स्टोन स्कुल धनगढी, लिटल फ्लावर बोर्डिङ हाइ स्कुल, हिल वर्ड स्कुल, एरिस्टो बोर्डिङ स्कुल, पञ्चोदय सेकेन्ड्री स्कुल, थ्रि स्टार बोर्डिङ स्कुल र क्रिस्टल एकेडेमी धनगढी सहभागी हुने जनाइएको छ ।
सहभागी १२ टिमलाई विभिन्न ४ समूहमा बिभाजन गरीएको छ भने लिग चरणबाट समूह विजेता टोली अघिल्लो चरण प्रवेश गर्नेछ ।
मृग गार्मेन्ट उद्योगको प्रयोजनमा हुने प्रतियोगिताको बिजेताले ३० हजार र उपबिजेताले १५ हजार पाउने छन् ।
यस्तै आयोजकले फागुन १८ गतेसम्म सन्चालन हुने प्रतियोगिताको तयारी तीब्र पारिएको जनाएको छ । स्कुलका प्रिन्सिपल रामचन्द्र शाहीले अब फुटबलका खेलाडी उत्पादनका लागि पनि स्कुलले फुटबल प्रतियोगिताको आयोजना गर्ने लागेको बताए ।
