मेसीको गोलमा मियामीको कठिन जित

काठमाडौं। अमेरिकी मेजर लिग सकर (एमएलएस) अन्तर्गत शनिबार राति भएको खेलमा इन्टर मियामीले डिसी युनाइटेडलाई २–१ ले पराजित गरेको छ।

बाल्टिमोरस्थित बाल्टिमोर रेभेन्सको घरेलु मैदानमा ७२ हजार २६ दर्शकको उपस्थितिमा खेल सम्पन्न भएको थियो। विश्वप्रसिद्ध खेलाडी लिओनल मेसीप्रति दर्शकहरूको उच्च चासो भएकाले खेल वासिङ्टनको सानो मैदानमा नभई बाल्टिमोरको ठूलो स्टेडियममा आयोजना गरिएको थियो।

मेसीले २७औं मिनेटमा गोल गर्दै इन्टर मियामीलाई पहिलो हाफमै २–० को अग्रता दिलाएका थिए। पछिल्ला ५० खेलमा मात्रै उनले ५२ गोल गरेका छन्। समग्रमा मेसीको करिअर गोल संख्या ८९९ पुगेको छ। अब थप एक गोल गरेमा उनले ९०० गोलको ऐतिहासिक उपलब्धि हासिल गर्नेछन्।

इन्टर मियामीका गोलकिपर डेयन सेन्ट क्लेयरले भने,‘बाहिरी मैदानमा खेल्दा पनि कहिलेकाहीँ हामीसँग घरेलु टोलीभन्दा धेरै समर्थक हुन्छन् भन्ने थाहा पाउँदा निकै राम्रो लाग्छ। सबै स्टेडियममा यस्तो नहुन सक्छ, तर आज भने त्यस्तै भयो।’

इन्टर मियामीका लागि अर्को गोल रोड्रिगो डे पाउलले गरेका थिए। डिसी युनाइटेडका ताइ बारिबोले ७५औं मिनेटमा गोल गर्दै अन्तर घटाए पनि टोली बराबरीमा ल्याउन असफल रहे।

गोलकिपर सेन्ट क्लेयरले मेरिल्यान्ड विश्वविद्यालयबाट कलेज फुटबल खेलेका थिए। उनले भने,‘मेरो कलेजका केही प्रशिक्षक र साथीहरू आज मैदानमा आएका थिए। मेरिल्यान्ड विश्वविद्यालयबाट खेल्दै आएको म अहिले यस्तो ठूलो स्टेडियममा खेल्न पाउँदा निकै विशेष अनुभव भयो।’

मेसी र उनको टोलीका लागि यो हप्ता निकै व्यस्त रह्यो। गत वर्षको एमएलएस कप विजेता टोलीका रूपमा उनीहरूले बिहीबार ह्वाइट हाउस भ्रमणसमेत गरेका थिए।

सेन्ट क्लेयरले भने,‘म गत वर्ष टोलीमा थिइन। त्यसैले मेरो लागि यो अनुभव अझ फरक थियो। जीवनमा सबैले यस्तो अवसर पाउँदैनन्।’

इन्टर मियामीले १७औं मिनेटमा खेलको पहिलो गोल गरेको थियो। डे पाउलले गोलपोस्टबाट करिब १५ यार्ड टाढाबाट प्रहार गरेको बल जालभित्र पठाएका थिए।

त्यसपछि मेसीले यो सिजनको आफ्नो तेस्रो गोल गर्दै टोलीको अग्रता दोब्बर बनाए। उनले मातेओ सिल्भेट्टीको पास लिएर एकै टचमा गोलकिपर शन जोन्सनलाई छक्याउँदै गोल गरेका थिए।

यस जितसँगै इन्टर मियामीले लगातार दोस्रो जित हासिल गरेको छ। सिजनको पहिलो खेलमा भने लस एन्जलस एफसीसँग ३–० ले पराजित भएको थियो। दोस्रो हाफमा डिसी युनाइटेडले एक गोल फर्कायो।

ज्याक्सन हप्किन्सको प्रहारमा सेन्ट क्लेयरले एक हातले बचाउ गरेका थिए। तर, रिबाउन्ड बललाई बारिबोले गोलमा परिणत गरेका थिए।