इटालीको ओज धानेको एटलान्टा

काठमाडौं। युभेन्ट्स बाहिरिएपछि सन् २००३–०४ सिजनदेखि च्याम्पियन्स लिगको अन्तिम १६ मा कम्तीमा एक इटालियन टोली रहने परम्परा जोगिने कि नजोगिने भन्ने प्रश्न उठेको थियो।

यो परम्परा एटलान्टाले डोर्टमुन्डविरुद्धको रोमाञ्चक पुनरागमन जितमार्फत जोगायो। खेलको अन्तिम प्रहारमै एटलान्टाका वैकल्पिक खेलाडी लाजार सामार्दजिचले पेनाल्टीमार्फत गोल गर्दै टोलीलाई ४–१ को जित दिलाए। भिडियो समीक्षा (भीएआर) पछि दिइएको उक्त पेनाल्टी इन्जुरी समयको आठौं मिनेटमा भएको थियो। समग्रमा एटलान्टाले ४–३ को जित निकाल्यो।

निर्धारित तीन मिनेटको इन्जुरी समय सकिइसकेको अवस्थामा डोर्टमुन्डका गोलरक्षक ग्रेगर कोबेलको गल्तीले एटलान्टालाई अन्तिम आक्रमणको अवसर दियो। पेनाल्टी क्षेत्रभित्र आएको क्रस निकोला क्र्स्टोभिचतर्फ जाँदै थियो। त्यही बेला डोर्टमुन्डका डिफेन्डर रेमी बेन्साबैनीले खुट्टा उठाउँदा एटलान्टाका वैकल्पिक खेलाडीको टाउकोमा लाग्यो र रगत बग्यो।

सुरुमा कर्नर दिइए पनि भिडियो सहायक रेफ्रीको जाँचपछि पेनाल्टी निर्णय गरियो। बेन्साबैनीलाई दोस्रो पहेँलो कार्ड देखाउँदै मैदानबाट बाहिर पठाइयो। त्यसपछि सामार्दजिचले पेनाल्टीलाई जालीको माथिल्लो कुनामा प्रहार गर्दै बर्गामो रंगशालामा उत्सवमय दृश्य सिर्जना गरे।

सिरी ‘ए’ च्याम्पियन नापोली भने ३६ टोली सहभागी लिग चरणमा ३०औं स्थानमा रहँदै प्लेअफसम्म पुग्न सकेन। इन्टर मिलान पनि मंगलबार सानो नर्वेजियन टोली बोदो/ग्लिम्टसँग प्लेअफमा पराजित हुँदै बाहिरिएको थियो।

अब एटलान्टाले अर्को चरणमा आर्सनल वा बायर्न म्युनिखमध्ये एकसँग प्रतिस्पर्धा गर्नेछ।