नेपाल भर्सेस इङ्ल्यान्ड : दबाबमा कप्तान ह्यारी ब्रुक !

काठमाडौं। ब्याटिङ क्षमतामा कुनै शंका नरहे पनि इङ्ल्यान्डका कप्तान ह्यारी ब्रुकको नेतृत्व क्षमतामाथि प्रश्न उठिरहेका छन्।

हालै अस्ट्रेलियामा भएको एशेज सिरिजमा भोगेको अपमानजनक नतिजासहित इङ्ल्यान्ड कठिन समयबाट गुज्रिरहेको छ। यही परिवेशमा इङ्ल्यान्डले आइतबार मुम्बईमा नेपालविरुद्ध खेल्दै आईसीसी टी–२० विश्वकपको सुरुआत गर्नेछ।

इङ्ल्यान्डका अलराउन्डर विल ज्याक्सले टी–२० कप्तान ह्यारी ब्रुकलाई खेलाडीहरूको शतप्रतिशत समर्थन रहेको बताएका छन्। हाल आलोचनाको घेरामा रहेका २६ वर्षीय ब्रुक पहिलो पटक विश्वस्तरीय प्रतियोगितामा कप्तानी गरिरहेका छन्।

गत महिना न्युजिल्यान्ड भ्रमणका क्रममा नाइट क्लबका सुरक्षाकर्मीसँग भएको विवादमा संलग्न भएपछि ब्रुकले माफी मागेका थिए। यसलाई उनले ठूलो गल्ती स्वीकार गरेका छन्।

ब्रुकसँग यु–१९ टोलीदेखि सँगै खेलेका ज्याक्सले मुम्बईमा प्रशिक्षणअघि सञ्चारकर्मीहरूसँग भने,‘म न्युजिल्यान्डमा थिइन। त्यसैले घटनाबारे धेरै थाहा थिएन। तर, उनले गलत निर्णय लिएका हुन् भन्ने स्वीकार गरेका छन्। अहिले उनी मैदानमा सुधार गर्दैछन् र हामी सबैले उनलाई पूर्ण समर्थन गरेका छौं।’

नेपालविरुद्ध ब्याटिङमा ध्यान

प्रतिभाशाली रन–स्कोरर ब्रुकका लागि नेपालविरुद्धको खेल आलोचनाबाट मुक्त भएर आफ्नो ब्याटिङमार्फत जवाफ दिने अवसर हुनेछ। ‘उनको खेलले नै सबै बोलोस् भनेर उनी चाहन्छन्,’ ज्याक्सले भने।

श्रीलंकाविरुद्धको टी–२० सिरिज ३–० ले जित्दै इङ्ल्यान्ड विश्वकप सुरुआत गर्न लागेको हो। सोही सिरिजअघिको एकदिवसीय खेलमा ब्रुकले मात्र ६६ बलमा १३६ रनको विस्फोटक इनिङ्स खेलेका थिए।

‘हामी मोमेन्टमभन्दा बढी टिम एकतामा विश्वास गर्छौं,’ ज्याक्सले भने,‘ह्यारी कप्तान बनेपछि पछिल्ला १२ महिनामा हामीले राम्रो प्रदर्शन गरेका छौं। श्रीलंकाको यात्रा अर्को महत्त्वपूर्ण खुड्किलो हो।’

समूह ‘सी’ मा इङ्ल्यान्ड, नेपाल, दुईपटकको च्याम्पियन वेस्ट इन्डिज, डेब्यु टोली इटाली र स्कटल्यान्ड रहेका छन्। इङ्ल्यान्ड ‘सुपर एट’मा पुग्ने प्रबल दाबेदार मानिएको छ।

‘हामी आत्मविश्वासका साथ आएका छौं। तर, यसमा केही ग्यारेन्टी दिन सकिँदैन,’ ज्याक्सले भने,‘भारत घरेलु मैदानमा खेल्दैछ, सबैलाई थाहा छ फेभरेटको हो।’

नेपालसँग पहिलो भेट

इङ्ल्यान्ड टी–२० विश्वकपको संयुक्त रूपमा सबैभन्दा सफल टोलीमध्ये एक हो। वेस्ट इन्डिज र हालको च्याम्पियन भारतसँगै इङ्ल्यान्डले दुई पटक उपाधि जितेको छ।

पहिलो पटक पउल कोलिङवुडको कप्तानीमा र दोस्रो पटक २०२२ मा जोस बटलरको नेतृत्वमा इङ्ल्यान्ड च्याम्पियन बनेको थियो।

नेपालले सन् २०१४ मा पहिलो पटक टी–२० विश्वकप खेलेको थियो। त्यसपछि २०२४ मा वेस्ट इन्डिज–अमेरिका संयुक्त आयोजनामा दोस्रो सहभागिता जनायो। दुवै पटक नेपाल समूह चरणमै बाहिरिएको थियो।

नेपालविरुद्धको खेलअघि इङ्ल्यान्डलाई राहत मिलेको छ। ब्याट्सम्यान फिल साल्ट फिट घोषित भएका छन्। उनी जोस बटलरसँग ओपनिङ गर्नेछन्। श्रीलंकाविरुद्धको पछिल्लो खेलमा ढाड दुखाइका कारण बाहिरिएका साल्टले शुक्रबार प्रशिक्षण गरेका थिए।

त्यसलगत्तै टोलीमा स्थान बनाएका हुन्। टम ब्यान्टनले बेन डकेटलाई पछि पार्दै नम्बर चारमा ब्याटिङ गर्नेछन्। बलिङतर्फ लुक वुड, जोफ्रा आर्चर र साम करनले तीव्र आक्रमण सम्हाल्नेछन्।

स्पिन विभागमा आदिल राशिद र लियाम डसनसँगै ज्याकब बेथेल र विल ज्याक्स विकल्पका रूपमा रहनेछन्।