साँच्चिकै घाइते छन् एमबाप्पे ?

काठमाडौं। किलियन एमबाप्पेले बुधबार आफू घाइते हुँदा रियल मड्रिडले गलत खुट्टाको जाँच गरेको भन्ने समाचारलाई अस्वीकार गरेका छन्।

फ्रान्सेली प्रसारण संस्था आरएमसी स्पोर्टको फुटबल कार्यक्रम ‘आफ्टर फुट’ ले यस साता स्पेनिस क्लबले डिसेम्बरमा एमबाप्पेको बायाँ घुँडाको सट्टा दायाँ घुँडाको स्क्यान रिपोर्ट गरेको थियो। स्पेनका अन्य मिडियाले पनि यस्तै समाचार प्रकाशित गरेका थिए। यसमा अधिकांशले आरएमसीको रिपोर्टलाई उद्धृत गरेका थिए।

एमबाप्पे जनवरीभर खेलिरहेका थिए। तर, त्यसपछि उनी करिब साढे तीन हप्ता मैदान बाहिर बसे र हालै मात्र पुनः मैदानमा फर्किएका छन्।

ब्राजिलविरुद्धको विश्वकप तयारी खेलअघि आयोजित पत्रकार सम्मेलनमा एमबाप्पेले भने,‘गलत घुँडा जाँच गरिएको भन्ने रिपोर्ट असत्य हो।’

उनले थपे,‘सायद अप्रत्यक्ष रूपमा म पनि यस अवस्थाको जिम्मेवार छु। किनभने जब तपाईं आफ्नो अवस्थाबारे स्पष्ट जानकारी दिनुहुन्न तब अन्य व्याख्याहरूका लागि ढोका खुल्छ।’

क्लबले डिसेम्बरको अन्त्यतिर एमबाप्पेको बायाँ घुँडामा चोट आएको जनाएको थियो। एमबाप्पेले रियलसँग आफ्नो राम्रोसँग कुराकानी भइरहेको पनि बताएका छन्।

फ्रान्सले बिहीबार ब्राजिलसँग खेल्नेछ र आइतबार कोलम्बियाविरुद्ध प्रतिस्पर्धा गर्नेछ। सोमबार पेरिसमा एमबाप्पेले आफ्नो घुँडा अहिले ठिक भएको बताएका थिए।

उनी आफ्नो फर्म फर्काउने क्रममा रियलका पछिल्ला दुई खेलमा वैकल्पिक खेलाडीका रूपमा प्रयोग भएका थिए। एमबाप्पेले भने,‘त्यो समयमा धेरै निराशा, रिस र केही समय त चिन्ता पनि थियो। मलाई के भइरहेको छ भन्ने नै थाहा थिएन। त्यो समय मैले राम्रोसँग पार गर्न सकिनँ। म त्यतिबेला खुसी खेलाडी थिइनँ। तर, अहिले म खुसी छु, किनभने त्यो सबै पछाडि छ। अब सबै ठीक भइसकेको छ।’