आफूले जितेको उपाधि मोरक्कोलाई दिएपछि सेनेगल अदालतमा

काठमाडौं। अफ्रिका कप अफ नेशन्सको उपाधि पुनः आफूलाई दिनुपर्ने मागसहित सेनेगल राष्ट्रिय फुटबल टोलीले गरेको अपिल बुधबार खेलकुदको सर्वोच्च अदालत कोर्ट अफ आर्बिट्रेशन फर स्पोर्ट (सीएएस)मा दर्ता भएको छ।

अदालतले यस विषयमा निर्णय आउन लामो समय लाग्न सक्ने संकेत गरेको छ। सेनेगल फुटबल संघले गत साता अफ्रिकी फुटबल महासंघ (सीएएफ)ले गरेको अप्रत्याशित निर्णयलाई चुनौती दिएको हो।

सीएएफले जनवरीमा मैदानमै भएको विवादास्पद फाइनलपछि जितेको उपाधि खोसेर आयोजक मोरोक्को राष्ट्रियलाई विजेता घोषणा गरेको थियो।

सेनेगल सरकारसमेतले सीएएफभित्र भ्रष्टाचारको आशंका भएको भन्दै अन्तर्राष्ट्रिय अनुसन्धानको माग गरेको छ र सीएएसमा अपिल गर्ने घोषणा गरेको थियो।

सीएएसले सेनेगल संघले सीएएफले अझैसम्म आफ्नो निर्णयको विस्तृत लिखित कारण नदिएको भन्दै अपिलसम्बन्धी कागजात बुझाउन थप समय पनि मागेको छ।

अदालतले भनेको छ,‘अहिलेकै चरणमा प्रक्रिया कति समय लाग्छ भन्ने स्पष्ट भन्न सकिँदैन र सुनुवाइ कहिले हुन्छ भन्ने पनि तय भएको छैन।’

यो विवाद जनवरीमा मोरोक्कोको रबाटमा भएको फाइनलपछि सुरु भएको हो। खेलको अन्तिम समयमा मोरोक्कोलाई निर्णायक पेनाल्टी दिइएपछि सेनेगलका खेलाडीहरूले १५ मिनेटसम्म विरोध गर्दै मैदान छाडेका थिए।

पछि खेल पुनः सुरु भयो र मोरोक्कोको पेनाल्टी बचत भएपछि खेल अतिरिक्त समयमा पुग्यो। अतिरिक्त समयमा सेनेगलले १–० गोल गर्दै जित निकालेको थियो।

फुटबलका नियमअनुसार मैदानमा रेफ्रीको निर्णय अन्तिम मानिन्छ। तर, सीएएफका अपिल न्यायाधीशहरूले प्रतियोगिताको नियम उद्धृत गर्दै खेल्न अस्वीकार गर्ने टोलीलाई प्रतियोगिताबाट हटाइने प्रावधानका आधारमा सेनेगललाई सजाय दिएका थिए।

गत साता आएको यो निर्णयले मोरोक्कोले अन्तर्राष्ट्रिय फुटबल राजनीतिमा बढ्दो प्रभाव जमाइरहेको धारणा पनि बलियो बनाएको छ। विशेषगरी उसले २०३० को विश्वकप सह–आयोजना गर्ने तयारी गरिरहेको सन्दर्भमा।

सीएएफका अध्यक्ष प्याट्रिस मोटसेपेले भने कुनै पनि अफ्रिकी देशलाई विशेष प्राथमिकता नदिइने बताएका छन्। सीएएसमा गरिएको अपिल प्रक्रियामा सामान्यतः सुनुवाइ तय हुन महिनौं लाग्न सक्छ र अन्तिम निर्णय आउन अझै समय लाग्ने सम्भावना हुन्छ।

सीएएसका महानिर्देशक माथियु रिबले भनेका छन्,‘हामी बुझ्छौं कि टोली र समर्थकहरू अन्तिम निर्णय छिटो जान्न चाहन्छन्। हामी सबै पक्षलाई न्यायपूर्ण सुनुवाइ सुनिश्चित गर्दै प्रक्रिया सकेसम्म छिटो अघि बढाउनेछौं।’