युवा र अनुभवीको मिश्रणले विश्वकपको दाबेदार अस्ट्रेलिया

टी–२० विश्वकप २०२६ विशेष

काठमाडौं। पछिल्ला दुई वर्षमा अस्ट्रेलियाले आफ्नो टी–२० आई खेलमा उल्लेखनीय सुधार गरेको छ। २४ खेल खेलेको यो टोलीले १७ जित र ७ हार बेहोरेको छ।

गत वर्ष जुलाई–अक्टोबरमा वेस्ट इन्डिज, साउथ अफ्रिका र न्यूजिल्यान्डविरुद्ध सिरिज जित्दा अस्ट्रेलियाले एक मात्र खेल गुमाएको थियो। पाकिस्तान दौडमा भने अस्ट्रेलियाले नयाँ र अनुभवीसहित मिश्रित टोली लगेको थियो। उक्त टोली तीन खेलमा पराजित भयो। योसँगै टोलीले स्पिन विभागमा सुधार गर्नुपर्ने शिक्षा पाएर फर्कियो।

तर, सोही टिमसँग लाहोरमा भर्खरै सम्पन्न सिरिजमा भने अस्ट्रेलियाले सुधारिएको प्रदर्शन गर्‍यो। ३–० को उक्त नतिजाले समेत अस्ट्रेलिया अब विश्वकपमा कमजोर नरहेको प्रमाणित गर्छ।

तर, इतिहासले भने निरन्तरता चुनौतीपूर्ण रहेको देखाउँछ। २०२१ मा घरमै जितेको उपाधि रक्षा गर्न यो टोली असफल रह्यो। २०२४ मा त भारतले अस्ट्रेलियालाई सेमिफाइनलमै रोक्यो। त्यसपछिका डेविड वार्नर, मैथ्यू वेड, मिचेल स्टार्क र ऐश्टन एगारजस्ता अनुभवी खेलाडीले सन्न्यास लिँदा टिम संरचनामा ठूलो परिवर्तन आयो।

युवा र अनुभवीको मिश्रण

टिममा पुराना सिनियर खेलाडीहरू अझै अहम् भूमिका खेलिरहेका छन्। क्यामरुन ग्रीन, जोश इंग्लिस र नाथन एलीसले स्थिरत प्रदर्शन गरिरहेका छन्। पेसर प्याट कमिन्सको अनुपस्थितिले जेभियर बार्टलेजस्ता नयाँ खेलाडी उदाएका छन्। उनी पहिलो पटक विश्वकपमा देखिनेछन्।

स्पिन विभाग पनि सशक्त छ। ऐडम जम्पा र ग्लेन म्याक्सवेलले टोलीमा निरन्तरता पाएका छन्। मैथ्यू कुन्हेमन तथा कूपर कोनलीको युवा ऊर्जाले अस्ट्रेलियालाई थप मजबुत बनाएको छ।

म्याक्सवेल र मार्कस स्टोनिसले आगामी विश्वकपमा निर्णायक भूमिका खेल्न सक्छन्। २०२८ मा अस्ट्रेलिया आफैंले घरेलु मैदानमा विश्वकप आयजना गर्दैछ। त्यसैले यो विश्वकपले यस्ता अनुभवी खेलाडलाई टिममा राख्ने या नराख्ने भन्ने निर्णय पनि गर्नेछ।

कप्तान मिचेल मार्श रेड–बल क्रिकेटबाट अलग भएकाले अर्को विश्वकपमा खेल्ने सम्भावना बढाएको छ। जोश हेजलवुड र कमिन्सका लागि फर्म्याट सन्तुलन महत्त्वपूर्ण हुनेछ।

अस्ट्रेलियाका पहिलो चरणका सबै खेल श्रीलंकामै छन्। स्पिनरको टिम भएका कारण श्रीलंकाको पिचले टोलीको परीक्षा लिने सम्भावना छ।

तर, राहतको कुरा भनेको अस्ट्रलियाले सुपर–८ का खेल भारतमा खेल्नेछ। भारतको पिचमा भने यो टोलीका अधिकांस खेलाडीले खेलिसकेका छन्। तर, चेन्नईको जस्तो स्पिनमैत्री पिचमा अस्ट्रेलियाको प्रदर्शन कस्तो हुन्छ? हेर्नलायक हुनेछ।