फरक दिशातर्फ अघि बढेको नेपाल

टी–२० विश्वकप २०२६ विशेष

काठमाडौं। नेपाल क्रिकेट लामो समयसम्म भावनामा चलेको खेल थियो। समर्थकको भीड, सामाजिक सञ्जालको उत्साह र आकलझुकलमा गर्ने प्रदर्शनले प्राय: वाहवाही बटुलिरहन्थ्यो।

तर, पछिल्ला दुई वर्षमा यो टोली बिस्तारै फरक दिशातर्फ अघि बढेको छ। अब कुरा खेल्ने मात्र होइन, प्रतिस्पर्धा गर्नेसम्ममा पुगेको छ। २०२४ को टी–२० विश्वकपमा अमेरिका र क्यारिबियनमा नेपालले देखाएको प्रदर्शन त्यसको संकेत दिन्छ।

दक्षिण अफ्रिकालाई एक रनले हार्नुको पीडादायक टोलीमा थियो। तर, बंगलादेशलाई १०६ रनमै समेट्नुले नेपालसँग खेल जित्न सक्ने क्षमता छ भन्ने स्पष्ट देखायो। त्यो बेला कमजोरी सीपमा होइन, दबाब सम्हाल्ने अनुभवमा नेपाल परिपक्क बन्न सकेको थिएन।

तर, त्यसपछि नेपाललाई स्थिर बनाएको छ। त्यो ओमानमा भएको टी–२० विश्वकप छनोटमा युएईविरुद्धको खेलले पनि प्रमाणित गर्छ। १२ अक्टोबर २०२५ मा भएको उक्त खेलमा नेपाल १ रनले विजयी भएको थियो।

१४१ रनको लक्ष्य पछ्याएको युएईले निर्धारित २० ओभरमा ९ विकेट गुमाउँदै १३९ रन बनाएको थियो।

उही अनुहार, फरक आत्मविश्वास

आगामी विश्वकपमा नेपाल २०२४ कै आधारमा उभिएको छ। त्यस टोलीका १० खेलाडी फेरि टोलीमा छन्। कप्तानीमा पनि निरन्तरता छ, रोहित पौडेल। उमेरले युवा भए पनि उनी अब आशा होइन, भरोसाको नाम बन्दै गएका छन्।

नेपाल प्रिमियर लिग (एनपीएल)को दोस्रो सिजनले उनको नेतृत्वलाई थप प्रमाणित गरेको छ। लुम्बिनी लायन्सले खराब सुरुआत गरेको थियो।

तर, लगातार जित निकाल्दै उपाधि जित्यो। त्यसलाई रणनीतिक सफलतामात्र मान्न सकिने अवस्था छैन। दबाबमा निर्णय लिन सक्ने क्षमता उनीमा छ भन्ने प्रमाणित पनि भएको छ।

नेपाली टोलीमा सबै खेलाडी सक्रिय घरेलु लिगबाट आएका छन्। एनपीएलले खेलाडीलाई निरन्तर प्रतिस्पर्धा, राम्रो तयारी र विदेशी खेलाडीहरूसँग खेल्ने मौका दिएको छ। नन्दन यादव र शेर मल्लाजस्ता खेलाडी यही प्रतियोगिताबाट राष्ट्रिय टोलीमा पुगेका हुन्। यी दुईले फाफ डु प्लेसिस, मार्टिन गुप्टिल र जिमी निशामसँग खेलेर अन्तर्राष्ट्रिय स्तरको ‘एक्सपोजर’ बटुलिसकेका छन्।

अर्को कुरा ओमानमा भएको टी–२० विश्वकप छनोटमा नेपाल अपराजित रह्यो। त्यसअघि युएईमा वेस्ट इन्डिजलाई २–१ ले हराउनु ऐतिहासिक उपलब्धि थियो। पूर्ण सदस्य राष्ट्रविरुद्ध जित अब नेपालका लागि असम्भव रहेन।

‘प्लेअर टु वाच’

शेर र करण केसी अहिले नेपालका दुई फरक तर महत्त्वपूर्ण अनुहार हुन्। शेर नियन्त्रण र धैर्यमा आधारित अफ–स्पिनर हुन्।

एनपीएलमा २०२५ मा उनी संयुक्त रूपमा सर्वाधिक विकेट लिने बलर बने। नयाँ बल दिएर प्रयोग कप्तान रोहित रोहितले जोखिम लिएका थिए। तर, १७ विकेट लिँदै रोहितको विश्वासमा उनी खरो उत्रिए।

करणको खेल भने समयसँगै परिपक्व भएको छ। उनी अब पहिलेभन्दा छिटो र सटीक छन्। २०२३ एसिया कपमा रोहित शर्माविरुद्ध देखाएको प्रभाव अहिले निरन्तरतामा परिणत हुँदैछ। ब्याटिङ योगदानले उनलाई अझ उपयोगी बनाएको छ।