साबिक विजेतालाई पहिलो खेलमै सकस !

काठमाडौं। विभागीय टोली एपीएफ क्लबमाथि सकसपूर्ण जित निकाल्दै साबिक विजेता हेल्प नेपाल स्पोर्ट्स क्लबले नवौं एनभीए महिला तथा पुरुष क्लब भलिबल च्याम्पियनसिपमा पुरुषतर्फ सुखद् सुरुआत गरेको छ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शुक्रबार सम्पन्न उद्घाटन खेलमा हेल्प नेपालले ३–० को सेटमा जित हात पारेको हो। योसँगै समूह ‘ए’मा रहेको हेल्प नेपालले ३ अंक हात पारेको छ।

प्रतिस्पर्धात्मक खेलमा हेल्प नेपालले पहिलो सेट २५–२१ ले आफ्नो बनाएको थियो। दोस्रो सेटमा पनि जित निकाल्न उत्तिकै संघर्ष गर्नुपर्‍यो। तर, उक्त सेट २५–२० ले जित्न सफल भयो। तेस्रो सेटमा पनि आफ्नो च्याम्पियन छबी कायम राख्दै हेल्प नेपालले २५–२० ले आफ्नो पक्षमा पार्‍यो।