एएफसीले ‘एएफसी नेसन्स लिग’ गर्ने

काठमाडौं। एसियाली फुटबल महासंघ (एएफसी) ले एएफसी नेसन्स लिग सञ्चालन गर्ने तयारी अघि बढाएको छ।

एसियाभरका राष्ट्रिय टोली फुटबलको स्तर उकास्ने उद्देश्यसहित यो प्रतियोगिता गर्न लागिएको एएफसीले जनाएको छ।

एएफसीका अनुसार फिफा अन्तर्राष्ट्रिय ‘म्याच विन्डो‘को प्रभावकारी उपयोग हाल चुनौतीपूर्ण बन्दै गएको छ। सीमित प्रतिद्वन्द्वी उपलब्धता, बढ्दो खर्च र जटिल व्यवस्थापनका कारण धेरै राष्ट्रिय टोलीले अपेक्षित स्तरका खेल खेल्न पाइरहेको अवस्था छैन। यसले अन्तर्राष्ट्रिय मैत्रीपूर्ण खेलको एक्सपोजरसम्म घटाएको एएफसीको ठहर छ।

यी समस्यालाई मध्यनजर गर्दै एएफसीले दिगो प्रतियोगिता ढाँचा आवश्यक रहेको निष्कर्ष निकालेको हो। विस्तृत अध्ययन र सरोकारवालासँगको परामर्शपछि एएफसीले लिग सुरु गर्ने निर्णय गरेको जनाएको छ।