भान डाइकको चाहना– सलाह लिभरपुलमै रहून्

काठमाडौं। ब्राइटनविरुद्धको खेलमा ‘स्क्वाड’मा फर्कँदै मोहम्मद सलाहले उत्कृष्ट प्रदर्शन गरेका छन्। २–० को जितमा लिभरपुलको दोस्रो गोल हुगो एकिटिकेले गरेका थिए। जसमा असिस्ट सलाहकै थियो।

तर, यस प्रदर्शनपछि पनि एनफिल्डमा इजिप्टियन स्टारको भविष्य अझै अनिश्चित बनेको छ। लिभरपुलका कप्तान भर्जिल भान डाइकले सलाह क्लबमै रहून् भन्ने चाहना व्यक्त गरेका छन्। तर, उनले अनिश्चितता रहेको कुरा स्वीकार गरेका छन्।

यस विषयमा भान डाइकले भने,‘पहिलो कुरा यो मेरो मात्र विषय होइन। यो सम्पूर्ण टोलीको कुरा हो। म मो (सलाह) सँग कुरा गर्छु, प्रायः सबै खेलाडीसँग कुरा हुन्छ। सुन्नु नै सबैभन्दा महत्त्वपूर्ण हो। यदि टोलीभित्र समस्या सिर्जना भएर प्रदर्शनमा असर पर्‍यो भने त्यो फरक कुरा हुन्छ। तर, हामी पूर्ण रूपमा एकजुट छौं र सँगै अघि बढिरहेका छौं।’

लिड्सविरुद्धको ३–३ बराबरीपछि एक अन्तर्वार्तामा असन्तोष व्यक्त गरेपछि सलाहलाई च्याम्पियन्स लिगमा इन्टर मिलानविरुद्धको खेलको ‘स्क्वाड’बाट बाहिर राखिएको थियो। त्यसपछि यो विषयले निकै चर्चा पाए पनि।

ब्राइटनविरुद्ध शनिबार (१३ डिसेम्बर) भएको खेलमा प्रशिक्षक आर्ने स्लटले उनलाई पुनः टोलीमा फर्काए। घाइते जो गोमेजको स्थानमा २६औं मिनेटमा मैदान प्रवेश गरेका सलाहले फर्किँदै प्रभाव जमाए। उनले लिएको कर्नरबाटै एकिटिकेले आफ्नो दोस्रो गोल गरेका थिए।

यो खेल नै सलाहका लागि लिभरपुलमा अन्तिम पनि हुन सक्छ। उनी अफ्रिका कप अफ नेसन्स खेल्न इजिप्ट फर्कँदैछन्। योसँगै उनी एक महिनाभन्दा बढी समय इंग्ल्यान्डबाहिर रहनेछन्। यही समयले उनको दीर्घकालीन भविष्यबारे निर्णय लिने अवसर दिन सक्नेछ।

भान डाइकले भने,‘मो अफ्रिका कप अफ नेसन्स खेल्न जाँदैछ। हामी आशा गर्छौं ऊ त्यहाँ सफल हुनेछ र पक्कै पनि फर्किएर आउनेछ। यो हाम्रो लागि सिजनको बाँकी समय निकै महत्त्वपूर्ण छ। तर, फुटबलमा के हुन्छ, कसैलाई थाहा हुँदैन। म चाहन्छु ऊ यहाँ रहोस्, किनकि ऊ मेरा स्ट्राइकरहरूमध्ये एक महत्त्वपूर्ण खेलाडी हो।’

‘थ्रोन अन्डर द बस’ (दोष थोपरेको) भन्ने टिप्पणी र प्रशिक्षक स्लटसँगको सम्बन्धबारे नकारात्मक चर्चा भएपछि पनि लिभरपुलले लगातार दुई खेल जितेको छ। गत शुक्रबार (१२ डिसेम्बर) सलाहले लिभरपुलका प्रशिक्षक स्लटसँग कुरा गरेर विषय मिलाएका थिए। त्यसपछि उनलाई फेरि ‘म्याच–डे’ योजनामा समावेश गरिएको थियो।

यस हप्ताको प्रभावबारे भान डाइकले भने,‘यी कुराहरू पर्दा पछाडि सम्हाल्नुपर्छ। तर, प्रदर्शनले सबै कुरा बताउँछ हामी एकजुट छौं, यही सबैभन्दा महत्त्वपूर्ण कुरा हो।’