मेसीलाई टी–२० विश्वकपको टिकट उपहार

काठमाडौं। ‘गोट इन्डिया टुर’को तेस्रो तथा अन्तिम दिन आइतबार अर्जेन्टिनाका फुटबल सुपरस्टार लिओनल मेससी दिल्लीमा रहेका थिए। दिउँसो दिल्ली पुगेपछि मेसी आफ्ना साथी खेलाडी लुइस सुआरेज र रोड्रिगो डे पउलसँगै अरुण जेटली स्टेडियम पुगे।

दिल्ली भ्रमणका क्रममा अन्तर्राष्ट्रिय क्रिकेट परिषद् (आइसीसी)का अध्यक्ष जय शाहले मेसीलाई भारतको १० नम्बर जर्सी र टी–२० विश्वकपको टिकट उपहारस्वरूप प्रदान गरे।

मेसी स्टेडियम पुग्दा त्यहाँ ‘सेलिब्रिटी मेसी अल स्टार्स’ र ‘मिनर्भा मेसी अल स्टार्स’ बीच एक प्रदर्शनी खेल भइरहेको थियो। उक्त खेलमा मिनर्भा मेसी अल स्टार्सले सेलिब्रिटी मेसी अल स्टार्सलाई ६–० गोलले पराजित गर्‍यो।

मेसी र उनका दुई सहयात्रीको सम्मानमा अरुण जेटली स्टेडियममा विशेष कार्यक्रमको आयोजना गरिएको थियो। कार्यक्रममा आइसीसी अध्यक्ष शाहले मेसी, सुआरेज र डे पउललाई भारतको टी–२० विश्वकप जर्सी उपहार दिएका हुन्।

उक्त कार्यक्रममा दिल्लीकी मुख्यमन्त्री रेखा गुप्ता, भारतका पूर्वफुटबल स्टार बाइचुङ भुटिया तथा अन्य उच्च पदस्थ अतिथिहरूको उपस्थिति रहेको थियो। शाहले मेसीलाई खेलाडीको नाम र जर्सी नम्बर लेखिएको भारतको जर्सी हस्तान्तरण गरे। साथै, आउँदो टी–२० विश्वकपमा भारत र अमेरिकाबीच हुने खेलको टिकट पनि उपहार दिए।

मेसी आइतबार बिहानै मुम्बईबाट दिल्ली पुग्ने कार्यक्रम थियो। दिल्लीमा केही कार्यक्रममा सहभागी भएर साँझ प्रस्थान गर्ने तालिका तय गरिएको थियो। तर, घना कुहिरो र प्रतिकूल मौसमका कारण उनको उडान ढिलो भयो। पछिल्ला केही दिनदेखि दिल्लीको वायु गुणस्तर अत्यन्त खराब रहेको छ, जुन आइतबार ‘खतरनाक’ स्तरमा पुगेको बताइएको छ।

अन्ततः दिउँसो करिब २:३० बजे मेसी इन्दिरा गान्धी अन्तर्राष्ट्रिय विमानस्थलमा अवतरण गरे। त्यहाँबाट सिधै अरुण जेटली स्टेडियमतर्फ प्रस्थान गरे। दिल्ली भ्रमणका क्रममा मेसीले भारतका प्रधानमन्त्री नरेन्द्र मोदीसँग भेट गर्ने कार्यक्रम पनि रहेको छ।