रियलकै मैदानमा सिटीको जित

काठमाडौं। म्यानचेस्टर सिटीले सान्टियागो बर्नबाउमा रियल मड्रिडलाई २–१ ले हराउँदै च्याम्पियन्स लिगमा महत्त्वपूर्ण जित निकालेको छ।

यो हारसँगै रियलको खराब फर्म झनै गहिरिएको छ। पछिल्ला ८ खेलमा टोलीले जम्मा २ जित निकालेको छ। १२ अंकसहित रियल तालिकाको सातौं स्थानमा झरेको छ। १३ अंक रहेको सिटी भने चौथो स्थानमा उक्लिएको छ।

रियलले खेलको सुरुआत राम्रो गरे पनि दुई ठूला गल्तीले घरेलु टोलीलाई महँगो पर्‍यो। २८औं मिनेटमा काउन्टरबाट रोड्रिगोले लो सुट प्रहार गरेर ९ महिनापछि गोलको खडेरी तोडे। विनिसियस र भाल्भर्डेलाई रोक्न गाह्रो परेको सिटीको डिफेन्स त्यसबेला निकै छरिएको देखिन्थ्यो।

तर, सात मिनेटमै खेलको मोड बदलियो। किपर थिबाउ कोर्ट्वाले जोस्को ग्वार्डियोलको साधारण हेडर रोके पनि बल हातबाट छुट्यो र नाइको ओ’राइलीले रिबाउन्डमा गोल गर्दै खेल बराबरीमा ल्याए।

पाँच मिनेटपछि एन्टोनियो रुडिगरले बक्सभित्र एर्लिङ हालान्डलाई तानेर रोकेपछि पेनाल्टी दिइयो। भिएआरले निर्णय सच्याएपछि हालान्डले ४३औं मिनेटमा पेनाल्टीबाट गोल गर्दै सिटीलाई २–१ को अग्रता दिलाए। बर्नबाउमा उनको पहिलो गोल पनि यही थियो।

खेलपछि रोड्रिगोले निराशा व्यक्त गर्दै भने,‘हामीले उत्कृष्ट सुरुआत गर्यौं। खेल केही साना गल्तीले नतिजा पल्टियो। यस्तो गल्ती हुँदैन भन्नका लागि हामी यसकै अभ्यास गर्छौं, तर यस्तै हुन्छ। अगाडि बढ्नैपर्छ।’

पहिलो हाफको अन्तिमतिर सिटी थप हावी भयो। हालान्डका प्रहारलाई कोर्ट्वाले उत्कृष्ट बचाउ गरे। तर, बर्नबाउमा समर्थकको हूटिङ बढ्दै गयो। दोस्रो हाफमा पनि पेप ग्वार्डियोलाको टोलीले गति र दबाब कायम राख्यो।

फिल फोडेन र जेरेमी डोकुको गतिशील खेलले रियलका डिफेन्डरहरूलाई बारम्बार दबाबमा राख्यो। कोर्ट्वाले लगातार बचाउ गर्दै अन्तर बढ्न दिएनन्।

रियलले पनि केही अवसर बनायो। सब्स्टिट्युट एन्ड्रिकले अन्तिम मिनेटतिर पोस्टमा हिर्काए। तर, बराबरी गोल निकाल्न सकेनन्। गोलकर्ता ओ’राइलीले भने,‘यति कठिन मैदानबाट तीन अंक निकाल्नु ठूलो कुरा हो। वातावरण अविश्वसनीय थियो, तर हामीले काम पूरा गर्यौं।’