आईबा मेन्स वर्ल्ड बक्सिङ च्याम्पियनसिपको क्वार्टरफाइनलमा भिड्दै लालप्रसाद र चन्द्र

काठमाडौं। दुबईमा जारी आईबा मेन्स वर्ल्ड बक्सिङ च्याम्पियनसिपको क्वार्टरफाइनलमा बुधबार नेपालका लालप्रसाद उप्रेती र चन्द्र थापाले चुनौती प्रस्तुत गर्ने भएका छन्।

४८ किलो तौल समूहमा माल्युदोभाका खेलाडी माथि युनानिमस जित हासिल गर्दै यादव क्वार्टरफाइनलमा पुगेका हुन्। चन्द्रले भने अर्मानियाका मुक्केबाजलाई पराजित गर्दै क्वार्टरफाइनलको यात्रा सुनिश्चित गरेका हुन्।

मुख्य प्रशिक्षक दीपक महर्जनका अनुसार दुवै बक्सरले बुधबार साँझ ६:१५ मा चुनौती पेस गर्नेछन्। लालप्रसादले सेमिफाइनल प्रवेश गर्न काजकिस्तानका बक्सर झुस्सुपोभ तेमिरतासँग खेल्नेछन्।

तेमिरताले २०२१ मा भएको आईबा मेन्स वर्ल्ड बक्सिङ च्याम्पियनसिपमा स्वर्ण जितेका थिए।

चन्दले ५१–५४ केजीमा इरानका काजिमी मेहदलाई चुनौती पेस गर्नेछन्। अब दुवैले एउटा फाइट जितेमा ७५ हजार डलर प्राप्त गर्नेछन्।

आईबाले उक्त विश्व च्याम्पियनसिप विजेतालाई ३ लाख डलर, उपविजेतालाई १ लाख ७५ हजार डलर पुरस्कार राशि दिने घोषणा गरेको छ।