नासा नेपाललाई 'प्रेसिडेन्सियल अवार्ड'

काठमाडौं । अन्तर्राष्ट्रिय अटोमोबाइल फेडेरेसन (एफआईए)द्वारा प्रदान गरिने प्रेसिडेन्सियल अवार्डको लागि एसिया प्यासिफिक क्षेत्रबाट नेपालको मोटर स्पोर्ट्सको क्षेत्रमा काम गर्ने संस्था नेपाल अटोमोबाइल एसोसिएसन (नासा नेपाल) छनोट भएको छ ।

एफआईएका १ सय ५१ देशका स्पोट्र्स फेडेरेसनहरूमध्य महादेशीय रूपमा जम्मा ६ वटा फेडेरेसन मात्र सो अवार्डका लागि उत्कृष्टको सूचीमा सार्वजनीक भएका छन् । एफआईएका अध्यक्ष मोहम्मद बिन सुल्यमानले नतिजा सार्वजनिक गर्दै उत्कृष्ट सूचीमा समावेश भएकोमा नासा नेपाललाई बधाई दिएका छन् ।

प्रत्येक वर्ष सदस्य संघद्वारा सञ्चालन गरिएका परियोजना, सफल इभेन्ट, विशेष अभियान, प्राप्त उपलब्धि तथा संघको क्रियाशीलता जस्ता सूचकका आधारमा उम्मेदवारी मागिने गरिन्छ । उम्मेदवारको विस्तृत अध्ययन र मूल्यांकनपछि महादेशीय स्तरमा उत्कृष्ट फेडेरेसन चयन गरिन्छ । यस वर्ष एसिया प्यासिफिक क्षेत्रबाट अस्ट्रेलिया, श्रीलंका लगायत आधा दर्जनले उम्मेदवारी दिएका थिए ।

आधारभूत तहदेखि महादेशीय स्तरसम्म मोटर स्पोट्र्समा हासिल उपलब्धि, महिला, युवा, विद्यार्थी तथा शैक्षिक क्षेत्रको उल्लेखनीय सहभागिता, आधारभूत तहको फाउन्डेसन निर्माण, सार्वजनिक संलग्नता र पहिचानलाई मुख्य सूचक मान्दै नासा नेपालले अघि सारेको ‘ग्रासरुट टू ग्लोरी’ अभियानले यस प्रतिष्ठित सफलतामा योगदान पु¥याएको नासा नेपालका कार्यकारी निर्देशक गोबिन्द भट्टराईले बताए ।

आगामी डिसेम्बर ९ देखि १२ सम्म उज्बेकिस्तानको राजधानी तासकेन्तमा हुने एफआईएको साधारण सभामा सो अवार्ड प्रदान गर्ने भट्टराईले जनाएका छन् ।