रुकुमकोटमा पहिलोपटक इन्डोर स्केटिङ प्रतियोगिता आयोजना हुने

रुकुम पूर्व। रुकुमकोटमा पहिलोपटक इन्डोर स्केटिङ प्रतियोगिता आयोजना हुने भएको छ।

नेपाल स्केटिङ तथा स्केटबोर्डिङ एसोसिएसन र रेयान्स स्केट पार्कको संयुक्त आयोजनामा ‘प्रथम खुल्ला स्केटिङ प्रतियोगिता–२०८२’ गर्न लागिएको हो।

आयोजक संस्थाकी अध्यक्ष अस्मि बूढामगरका अनुसार प्रतियोगिता सबै उमेर समूह र स्तरका स्केटरका लागि खुला रहनेछ। सिनियरतर्फ दर्ता शुल्क ५०० रुपैयाँ र जुनियरतर्फ २०० रुपैयाँ तोकिएको छ।

उनले स्केटिङ खेलप्रति नयाँ पुस्ताको आकर्षण बढाउने, स्थानीय प्रतिभा पहिचान गर्ने र जिल्लाको आन्तरिक पर्यटन प्रवर्द्धनमा योगदान पुर्ज़ाउने उद्देश्यसहित प्रतियोगिता आयोजना गर्न लागिएको बताइन्। प्रतियोगिता सफलतापछि जिल्लामा औपचारिक स्केटिङ संघ गठनको पहल गर्ने योजनासमेत रहेको उनको भनाइ छ।

सिनियर पुरुष र महिलातर्फ पहिलो, दोस्रो र तेस्रो स्थान हासिल गर्ने खेलाडीलाई मेडल, प्रमाणपत्र र नगद पुरस्कार प्रदान गरिनेछ। पहिलो हुनेले १० हजार, दोस्रोले ७ हजार ५ सय र तेस्रोले ५ हजार रुपैयाँ प्राप्त गर्नेछन्।

जुनियर बोइज र गर्ल्सतर्फको समूहमा पनि विजेताले क्रमशः ५ हजार, ३ हजार र २ हजार रुपैयाँ पुरस्कार पाउनेछन्।