कुन्वरवर्ती र नवीनलाई यु–१४ इन्टर स्कुल फुटबलको उपाधि

बुटवल। कुन्वरवर्ती स्कूल र नवीन माध्यमिक विद्यालयले यु–१४ इन्टर स्कुल फुटबल प्रतियोगिताको उपाधि जितेका छन्।

एन्फा टेक्निकल सेन्टर, देवीनगरमा आइतबार सम्पन्न छात्रातर्फको फाइनलमा कुन्वरवर्तीले सिद्धार्थ इङ्लिस बोर्डिङ स्कूललाई ३–१ ले पराजित गरेको हो। कुन्वरवर्तीकी वर्षा सुनारले ह्याट्रिक गरिन्।

उनले खेलको पहिलो हाफको १२औं मिनेट र दोस्रो हाफको ११औं तथा १३औं मिनेटमा गोल गरिन्। सिद्धार्थका लागि लक्ष्मी थापाले सान्त्वना फर्काइन्।

छात्रतर्फको फाइनलमा नवीनले न्यु होराइजन स्कूललाई ७–० ले पराजित गर्दै उपाधि हात पारेको छ। नवीनका निशान्त चौधरीले चार र प्रमिश जोल्मी मगरले तीन गोल गर्दै टोलीलाई विजयी बनाए।

प्रतियोगितामा छात्रातर्फ विजेताले २० हजार र उपविजेताले १० हजार रुपैयाँ प्राप्त गरे। उत्कृष्ट गोलकिपर, सर्वाधिक गोलकर्ता र सर्वोत्कृष्ट खेलाडीले क्रमशः १५ सय र ३ रुपैयाँ प्राप्त गरे। उत्कृष्ट गोलकिपर प्रकृति थापा (सिद्धार्थ इङ्लिस बोर्डिङ स्कूल) र सर्वाधिक गोलकर्ता तथा सर्वोत्कृष्ट खेलाडी वर्षा सुनारलाई (कुन्वरवर्ती स्कूल) भइन्।

छात्रतर्फ विजेताले ४० हजार र उपविजेताले २० हजार रुपैयाँ प्राप्त गरे। उत्कृष्ट गोलकिपर अर्जुन भण्डारी (नवीन माध्यमिक विद्यालय) रहे। सर्वाधिक गोलकर्ता विशाल विक (सिद्धार्थ इङ्लिस बोर्डिङ स्कूल) र सर्वोत्कृष्ट खेलाडी प्रमिश जोल्मी मगर (नवीन माध्यमिक विद्यालय) घोषित भए।